لبنان حکومت کا عام پارلیمانی انتخابات اگلے برس 6مئی کو کرانے کا اعلان

بیروت(مانیٹرنگ ڈیسک )لبنان کے وزیر داخلہ نوہاد المشنوق نے کہا ہے عام پارلیمانی انتخابات کیلئے اگلے برس 6 مئی کی تاریخ مقرر کی گئی ہے۔خبر رساں ادارے رائٹرز کے مطابق نوہاد المشنوق کے دفتر سے جاری بیان میں کہا گیا 2018 میں الیکشن کے انعقاد کا باضابطہ حکم جاری کر دیا گیا ہے۔واضح رہے یہ انتخابات گزشتہ کچھ عرصے سے مسلسل مؤخر کیے جاتے رہے ہیں۔ موجودہ پارلیمنٹ کو 2009 میں منتخب کیا گیا تھا، جس کے بعد لبنانی پارلیمنٹ نے اپنی مدت میں تین مرتبہ توسیع کا فیصلہ بھی کیا۔ان انتخابات میں پہلی مرتبہ بیرون ملک مقیم لبنانی شہری بھی اپنا ووٹ ڈال سکیں گے، جن کیلئے ووٹنگ کا انعقاد 22 اور 28 اپریل کو کیا جائے گا۔گزشتہ ماہ لبنان میں اْسوقت سیاسی عدم استحکام د یکھا گیا تھا جب وزیراعظم سعد الحریری نے سعودی عرب کے دورے کے دوران اپنے عہدے سے استعفیٰ دیتے ہوئے کہا تھا لبنان پر حز ب اللہ کا اثر و رسوخ بڑھتا جارہا ہے اور ان کی جان کو خطرہ ہے اسلئے وہ عہدہ چھوڑ رہے ہیں لیکن صدر مشیل عون نے انکا استعفیٰ قبول نہیں کیا تھاجبکہ یہ رپورٹس بھی سامنے آئیں کہ سعد الحریری کو سعودی عرب میں نظربند کرلیا گیا تاہم انہوں نے ان خبروں کی تردید کردی تھی۔بعدا ز ا ں فرانسیسی صدر کی دعوت پر سعد الحریری سعودی عرب سے فرانس چلے گئے تھے۔گزشتہ ماہ کے آخر میں وہ بیروت واپس پہنچے اور لبنان کی آ ز ا دی کی تقریبات میں شرکت کیساتھ ساتھ فوجی پریڈ کا بھی معائنہ کیا۔رواں ماہ کے آغاز میں سعد الحریری نے مستعفی ہونے کا فیصلہ واپس لیتے ہوئے کہا وہ بطور سربراہ حکومت اپنا کام جاری رکھنا چاہتے ہیں۔
لبنان الیکشن اعلان