2018ء میں ثابت ہو جائے گا عوام نوازشریف کے شانہ بشانہ ہیں ، طلال

جڑانوالہ (آئی این پی )وزیر مملکت برائے داخلہ طلال چودھری نے کہا ہے کہ انتخابات وقت پر ہوں گے اور 2018ء میں ثابت ہو جائے گا کہ عوام میاں نوازشریف کے شانہ بشانہ کھڑے ہیں ، تبدیلی دھرنوں سے نہیں کارکردگی سے آتی ہے ،حلقہ این اے 76میں اربوں روپے کی لاگت کے منصوبے جاری ہیں۔ تحریک انصاف نے انتشار کی سیاست کو فروغ دیا اور دھرنوں کے باعث ملک کو ناقابل تلافی نقصان پہنچایا۔جڑانوالہ آمد پر میڈیا سے گفتگو میں انہوں نے کہاکہ عمران خان کے مقدر میں وزیر اعظم بننا نہیں لکھا ۔ ن لیگ کی حکومت نے اپنے وعدوں کو عملی جامہ پہنایا اور تبدیلی صرف ووٹ کی طاقت سے آتی ہے۔میاں نوازشریف کو منظم سازش کے تحت ہٹایا گیا ۔ لاہور تا کراچی براستہ جڑانوالہ موٹر وے کا قیام ن لیگ کا عوام کے لیے تحفہ ہے دیہات میں سوئی گیس کی فراہمی کے منصوبے جلد پایہ تکمیل تک پہنچ جائیں گے۔ آئندہ انتخابات میں کارکردگی کی بنیاد پر کامیابی حاصل کریں گے دھرنا گروپ کی جھوٹ ، منافقت ، انتشار اور الزام تراشی کی سیاست دفن ہو جائے گی۔ دوسروں پر بے بنیاد الزامات لگانے والوں کا اپنا کردار سوالیہ نشان بن چکا ہے۔ منفی سیاست اور قوم کا وقت برباد کرنے والوں کو پشیمانی کے سوا کچھ نہیں ملا۔ عوام کو خالی نعروں کھوکھلے دعوؤں اور منفی سیاست سے کوئی سرو کار نہیں ۔ جھوٹ اور بے بنیاد الزام تراشی کی سیاست کرنے والوں کی پرو ا ہ کیے بغیر آگے بڑھتے رہیں گے۔
طلاال چودھری