وزیر اطلاعات عظمٰی بخاری کا شرجیل میمن کی پریس کانفرنس پر ردعمل آ گیا

لاہور (ڈیلی پاکستان آن لائن) وزیر اطلاعات پنجاب عظمیٰ بخاری نے کہا ہے کہ ہماری مجبوری ہے کہ ہم کھل کر جواب نہیں دے سکتے ورنہ ہمارے پاس سندھ کے بلدیاتی الیکشن سے لے کر اب تک بہت ساری کہانیاں بتانے کو ہیں۔جو جماعت 16 سال سے کراچی کا کچرا نہیں اٹھا سکی وہ ہمیں لیکچر نہ دے۔سندھ میں تمام بڑے منصوبے وفاق کی مدد سے چل رہے ہیں۔ صوبہ سندھ کہ حالت یہ ہے کہ وہاں کئی برسوں سے لوگ جانور بندھے سکولوں اور ٹرانسپورٹ کا رونا رو رہے ہیں۔ ان خیالات کا اظہار انہوں نے شرجیل میمن کی پریس کانفرنس پر ردعمل دیتے ہوئے کیا۔

انہوں نے کہا کہ ہم نےان کو آئینہ دکھایا تو یہ برا مان گئے ہیں۔صوبائیت کارڈ کھیلنا ان کی پرانی عادت ہے۔  وزیر اطلاعات نے مزید کہا کہ ہمیں تو کبھی کبھی جواب دینا پڑ جاتا ہے تو آپ خفا ہوجاتے ہیں۔ یہ لوگ کہتے ہیں کہ ہم نے کبھی سیاست نہیں کی، میں پوچھتی ہوں کہ کیا ہر معاملے میں چچا بھتیجی کا ذکر کرنا سیاست نہیں ہے؟پنجاب میں کوئی منصوبہ ایک سال میں مکمل ہوجائے تو آپ لوگ تڑپنا شروع کردیتے ہیں۔

 عظمٰی بخاری نے کہا کہ اپنی حکومت کی 16 سال کی کارکردگی اور مریم نواز کی 1 سال کی کارکردگی کا جب دل چاہے معائنہ کرلیں۔اگر اپ کو کبھی صفائی اور خوبصورت سڑکیں دیکھنے کا شوق ہو تو لاہور لازمی چکر لگائیں۔