میکسیکو کے نائٹ کلب میں فائرنگ،4ہلاک،12زخمی

میکسیکوسٹی(اے این این) میکسیکو کے ایک نائٹ کلب کے باہر پیش آنے والے فائرنگ کے واقعے میں چارافراد ہلاک اور 12 زخمی ہوگئے۔ برطانوی نشریاتی ادارے کی رپورٹ کے مطابق فائرنگ کا واقعہ میکسیکو کے پلایا ڈیل کارمین ریزورٹ پر بی پی ایم الیکٹرانک میوزک فیسٹول کی اختتامی تقریب کے دوران پیش آیا۔ بی پی ایم فیسٹول کی انتظامیہ کی جانب سے جاری بیان کے مطابق پولیس نے تصدیق کی ہے کہ پلایا ڈیل کارمین کے علاقے میں بلیو پیرٹ نائٹ کلب میں ایک مسلح شخص نے فائرنگ کی جس کے نتیجے میں 4 افراد ہلاک اور 12زخمی ہوگئے۔ بیان میں کہا گیا کہ بی پی ایم سیکیورٹی ٹیم کے تین ارکان بھی ہلاک ہونے والوں میں شامل ہیں اور فائرنگ کا واقعہ کلب کے باہر پیش آیا۔ قبل ازیں بلیو پیرٹ کلب میں موجود عینی شاہدین کا کہنا ہے کہ انہوں نے فائرنگ کی آوازیں سنیں اور کم سے کم 5 افراد کے ہلاک ہونے کا خدشہ ہے۔ اس حوالے سے میکسیکن حکام کی جانب سے کوئی تصدیق سامنے نہیں آئی تھی۔ واضح رہے کہ یہ فیسٹول گزشتہ 10 برس سے منایا جارہا ہے اور امریکا اور برطانیہ سے آنے والے سیاحوں میں خاصہ مقبول ہے۔ بی پی ایم فیسٹول 10 روز تک جاری رہتا ہے اور اس میں 375 موسیقار ، ڈی جیز اور فنکار حصہ لیتے ہیں۔

گزشتہ ایک سال کے دوران اشیاء خورو نوش کی قیمتوں میں ہوشربا اضافہ، وہ کونسی چیز ہے جو سستی ہوئی ؟