چین کے ہاتھوں بھارتی فوجیوں کی ہلاکت،بالی ووڈ اداکار سلمان خان بھی چپ نہ رہے
ممبئی(ڈیلی پاکستان آن لائن) چین کے ساتھ کشیدگی کے دوران مارے گئے بھارتی فوجیوں کی ہلاکت پر انڈیا بھرمیں شدید غم و غصہ پایاجاتا ہے، عوام ، سیاستدان اور شوبز شخصیات بھی دکھ کااظہارکررہی ہیں۔
بالی ووڈ اداکار سلمان خان نےٹویٹر پر ہمالیہ ریجن میں مارے گئے بھارتی فوجیوں کو سراہتے ہوئےکہاہے کہ ان کی ہمدردیاں گلوان وادی میں ہلاک ہونے والے فوجیوں کے ساتھ ہیں، ان کی قربانی رائیگاں نہیں جائے گی۔ دکھ کی اس گھڑی میں وہ مرنے والوں کے خاندان کے ساتھ ہیں۔
My heart goes out to all brave hearts who hv laid down their lives at the Galwan valley. This sacrifice will not go to waste. I join their families in grief... #JaiHind #WeStandWithIndianArmy
— Salman Khan (@BeingSalmanKhan) June 17, 2020
خیال رہے ہمالیہ ریجن میں چین اور بھارت کی فوجوں میں ہونے والی لڑائی میں بیس بھارتی فوجی اہلکار مارے گئے ہیں جن میں ایک کرنل شامل ہے۔
دودرجن کے قریب ہلاکتوں سے بھارت کے کئی گھروں میں صف ماتم بچھ چکی ہے۔حکام کے مطابق چار شدید زخمی ابھی بھی ہسپتال میں زیرعلاج ہیں۔
چین اور بھارت کے درمیان 45سال میں پہلی بار خونریز جھڑپ ہوئی ہے جس میں اتنی بڑی تعداد میں ہلاکتیں ہوئی ہیں۔
چینی وزارت خارجہ کے ترجمان نے گزشتہ روز اپنے ایک بیان میں کہا تھا کہ بھارت کی جانب سے ایل اے سی پر کشیدگی پرمذاکرات کے دوران دراندازی کرنا قابل مذمت ہے۔اے ایف پی کے مطابق چین کی وزارت خارجہ کے ترجمان زاؤ لیجیان نے کہا کہ انڈین فوجیوں نے پیر کو دو بار سرحد پار کی اور انھوں نے ' چینی فوجیوں کو اشتعال دلوایا، ان پر حملے کیے جس کے نتیجے میں دونوں ملکوں کے فوجیوں کے درمیان زبردست جھڑپ ہوئی۔'
جب کہ خفت زدہ بھارتی وزارت خارجہ اب الزام چین پر لگارہی ہے کہ اس نے گلوان وادی پر معاہدے کی خلاف ورزی کی۔