سپیکر اسد قیصر کی زیر صدارت قومی اسمبلی کا اجلاس جاری
اسلام آباد ( ڈیلی پاکستان آن لائن) سپیکر اسد قیصر کی زیر صدارت قومی اسمبلی کا اجلاس جاری ہے جہاں حکومت کے پیش کردہ بجٹ پر بحث جاری ہے ۔
اجلاس سے قبل اپوزیشن ارکان نے سپیکر اسد قیصر سے ملاقات کی اور ایوان کا ماحول پر امن رکھنے پر گفتگو کی ، اسد قیصر نے اپوزیشن ارکان کو حکومتی بنچز کی جانب سے ماحول کو شائستہ رکھنے کی یقین دہانی اور اپوزیشن ارکان کو بھی تحمل مزاجی کی درخواست کی ۔
اسد قیصر نے کہا کہ قومی اسمبلی میں پیش آنے والے واقعات افسوسناک ہیں ، ایک دوسرے کو سنا جائے ، بجٹ پر فیصلہ عوام کریں گے ، حکومت اور اپوزیشن دونوں ایوان کے ضابطہ اخلاق کا خیال رکھیں ، 2020 میں حکومت کو 114 اور اپوزیشن کو 103 گھنٹے ملے ۔ میں کسی کو اٹھا کر ایوان سے باہر تو نہیں پھینک سکتا،میں جانبدار نہیں سب کو موقع دیتا ہوں ۔
اسد قیصر نے کہا کہ میں نے 7 ارکان اسمبلی کو ویڈیو دیکھ کر معطل کیا ، میری کسی سے ذاتی دشمنی یا عناد نہیں ،امید ہے کہ موجودہ صورتحال حل ہو جائے گی ، زیادہ ہنگامہ آرائی میرے ایوان سے جانے کے بعد ہوئی ، میں نے ہنگامے کی ویدیوز بھی دیکھی ہیں،چاہتا ہوں سب لوگ مل کر رولز کے ساتھ ایوان کو چلائیں ۔
اس سے قبل حکومت اور اپوزیشن کے مابین ایک تفصیلی ملاقات ہوئی جس میں معاہدہ کیا گیا کہ ایوان کا ماحول خوشگوار رکھا جائے گا ، گزشتہ دنوں جو حالات پیش آئے وہ دوبارہ نہیں ہوں گے ۔