ممبئی (ڈیلی پاکستان آن لائن )بھارتی گلوکارہ الکا یاگنک نے حیران کن انکشاف کیا ہے کہ القاعدہ کے سابق سربراہ اسامہ بن لادن میرے نمبر ون فین تھے۔
روز نامہ جنگ کے مطابق یہ انکشاف اس وقت سامنے آیا جب 2011ءمیں امریکی خفیہ ایجنسی (CIA) نے اسامہ بن لادن کے ایبٹ آباد کمپاونڈ سے کئی بالی ووڈ گانے برآمد کئے، جن میں ادیت نارائن، کمار سانو اور الکا یاگنک کے ہٹ گانے شامل تھے۔
حال ہی میں ایک انٹرویو میں الکا یاگنک نے ہنستے ہوئے سوال کیا کہ یہ میری غلطی تو نہیں ہے کہ وہ میرے فین تھے؟پوچھے گئے سوالوں کا گلوکارہ نے مزید دلچسپ جواب دیا کہ اسامہ بن لادن جو بھی تھے، کیسے بھی تھے، ان کے اندر کہیں نہ کہیں ایک چھوٹا سا فنکار ہو گا، اگر انہیں میرے گانے پسند تھے، تو اچھا ہے ناں۔
اسی انٹرویو میں الکا یاگنک نے بالی ووڈ کی اندرونی سیاست پر بھی روشنی ڈالی۔انہوں نے کہا کہ بہت سے گانے جو مجھے ملنے والے تھے، وہ سازش کے تحت مجھ سے لے لئے گئے، ایک سینئر گلوکارہ نے میرے خلاف بہت گندی سیاست کھیلی، میں کئی بار گانوں کی ریہرسل کر چکی ہوتی لیکن بعد میں پتہ چلتا کہ وہ گانا کسی اور نے گایا ہے۔
جہاں ایک طرف ان کی موسیقی کے لاکھوں مداح ہیں، وہیں اس بات نے سب کو حیران کر دیا کہ دنیا کے سب سے مطلوب شخص اسامہ بن لادن کا شمار بھی ان کے مداحوں میں ہوتا تھا۔
یہ دلچسپ انکشاف سوشل میڈیا پر خوب وائرل ہو چکا ہے اور صارفین اس پر دلچسپ تبصرے کر رہے ہیں۔
کچھ لوگ مزاحیہ انداز میں کہہ رہے ہیں کہ الکا یاگنک کی آواز کی دہشت کا عالم یہ تھا کہ اسامہ بھی اس کے دیوانے تھے جبکہ کچھ صارفین حیران ہیں کہ اسامہ کے کمپیوٹر میں بالی ووڈ گانوں کی کلیکشن کیا کر رہی تھی؟