پشاور(ڈیلی پاکستان آن لائن )کالعدم تنظیم کیلئے چندہ اکٹھا کرنے والے ملزم کو 10 سال قید اور 60 ہزار روپے جرمانے کی سزا سنا دی گئی۔
روزنامہ امت کے مطابق انسداد دہشت گردی کی خصوصی عدالت نے کالعدم تنظیم کیلئے چندہ اکٹھا کرنے میں گرفتار ملزم کے مقدمے کی سماعت کی۔
دوران سماعت پراسیکیوشن نے دلائل میں بتایا کہ ملزم فہیم خان پر کالعدم تنظیم کیلئے چندہ اکٹھا کرنے کا الزام تھا، ملزم کو سی ٹی ڈی پولیس نے 22 اگست 2023 کو حراست میں لیا تھا، ملزم کے خلاف دہشت گردی اور ریاست مخالف سرگرمیوں کا مقدمہ درج کیا گیا تھا۔
پراسیکیوشن کے مطابق تحقیقات مکمل ہونے کے بعد ملزم کے خلاف ٹرائل شروع کیا اور جرم ثابت ہونے پرعدالت نے ملزم کو 10 سال قید اور 60 ہزار روپے جرمانہ کر دیا۔