دبئی ٹیسٹ: نیوزی لینڈ کی محتاط بیٹنگ، 3 وکٹ کے نقصان پر234 رنز بنا لئے
دبئی (مانیٹرنگ ڈیسک) پاکستان اور نیوزی لینڈ کے درمیان دوسرا ٹیسٹ میچ جاری ہے اور نیوزی لینڈ نے کھیل کے پہلے روز3وکٹوں کے نقصان پر 234رنز بنا لئے ہیں، ٹام لیتھم نے شاندار کارکردگی کا مظاہرہ کرتے ہوئے ریکارڈ ساز سنچری سکور کی۔ دبئی انٹرنیشنل کرکٹ سٹیڈیم میں کھیلے جا رہے میچ میں نیوزی لینڈ نے ٹاس جیت کر پہلے بیٹنگ کافیصلہ کیا اور اوپنرز نے محتاط انداز میں بیٹنگ کرتے ہوئے 77 رنز کا آغاز فراہم کیا۔ نیوزی لینڈ کی پہلی وکٹ 77 کے مجموعی سکور پر گری جب برینڈن میکولم 43 رنز بنا کر احسان عادل کی گیند پر شان مسعود کے ہاتھوں کیچ ہوئے۔ نیوزی لینڈ کو دوسرا نقصان 153 کے مجموعی پر اٹھانا پڑا جب ولیم سن 32 رنز بنا کر ذوالفقار بابر کی گیند پر بولڈ ہوئے۔ نیوزی لینڈ کی تیسری وکٹ 226 کے سکور پر اس وقت گری جب ٹیلر یاسر شاہ کی گیند پر آؤٹ ہوگئے۔ ٹام لیتھم نے پہلے ٹیسٹ کی کارکردگی کو برقرار رکھتے ہوئے سنچری سکور کی اور 24 سال بعد مسلسل دو ٹیسٹ میچوں میں سنچری سکور کرنے والے نیوزی لینڈ کے پہلے بیٹسمین ہونے کا اعزاز اپنے نام کیا۔ ٹام لیتھم 103 اور ٹیلر 12 رنز کے ساتھ کریز پر موجود ہیں۔ پاکستان کی جانب سے احسان عادل ، یا سر شاہ اور ذوالفقار بابر نے ایک ایک وکٹ حاصل کی۔
