پنجاب میں سرکاری و نجی سکولوں کے اوقات کار تبدیل

لاہور(ڈیلی پاکستان آن لائن)پنجاب بھر کے تمام سرکاری و نجی سکولوں کیلئے موسم سرما کے نئے تدریسی اوقات کار کا اعلان کر دیا گیا۔

نجی ٹی وی چینل ہم نیوز کے مطابق محکمہ تعلیم کا کہنا ہے کہ ان اوقات کار school timing کا نفاذ کر دیا گیا ہے، یہ اوقات 31 مارچ 2026 تک نافذ العمل رہیں گے، یہ فیصلہ طلبہ کو سرد موسم کی شدت سے محفوظ رکھنے اور تدریسی عمل کو موثر انداز میں جاری رکھنے کے لئے کیا گیا ہے۔

نئے شیڈول کے تحت لڑکوں کے سنگل شفٹ سکول پیر سے جمعرات تک صبح آٹھ بج کر 45 منٹ سے دوپہر 2 بج کر 45 منٹ تک کھلے رہیں گے، جمعہ کے روز سکولوں میں ساڑھے بارہ بجے چھٹی ہوا کرے گی۔

لڑکیوں کے سنگل شفٹ سکول پیر سے جمعرات تک صبح ساڑھے آٹھ بجے سے دوپہر اڑھائی بجے تک کھلے رہیں گے، جمعہ کو 12 بج کر 15 منٹ پر چھٹی ہوا کرے گی۔

ڈبل شفٹ نظام والے سکولوں میں لڑکوں کی پہلی شفٹ صبح 8 بج کر 45 منٹ سے شروع ہو گی اور 12 بج کر 45 منٹ پر ختم ہو گی، جمعہ کے روز شفٹ ساڑھے بارہ بجے ختم ہو گی۔

لڑکوں کے لئے دوسری شفٹ پیر سے جمعرات تک دوپہر ایک بجے سے شام پانچ بجے تک ہوگی جبکہ جمعہ کو کلاسیں دو بجے شروع ہوں گی اور پانچ بجے چھٹی ہو گی۔

لڑکیوں کے ڈبل شفٹ سکولز میں صبح کی شفٹ پیر تا جمعرات 8 بج کر 30 پر شروع ہو گی اور ساڑھے بارہ کو ختم ہو گی، جمعہ کو شفٹ 12 بج کر 15 منٹ تک ہو گی۔

لڑکیوں کی دوسری شفٹ پیر سے جمعرات تک بارہ بج کر 45 منٹ سے شروع ہو گی اور 4 بج کر 45 منٹ پر ختم ہو گی، جمعہ کو کلاسیں 1 بج کر 45 منٹ سے شروع ہو کر 4 بج کر 45 منٹ تک جاری رہیں گی۔