کب تک اے ابرِ کرم ترسائے گا | الطاف حسین حالی|
کب تک اے ابرِ کرم ترسائے گا
مینہ بھی رحمت کا کبھی برسائے گا
پھل کچھ اے نخلِ وفا ! تجھ میں نہیں
جو لگائے گا تجھے، پچھتائے گا
دوست کا آیا ہی سمجھو اب پیام !
آج اگر آیا نہیں کل آئے گا
ذوق سب جاتے رہے جُز ذوقِ درد
اِک یہ لپکا دیکھیے کب جائے گا
وعظ آتا ہے تو آنے دو اُسے
پر مزا آنے کا یہاں کیا پائے گا
آئے گا اور ہم کو شرمائے گا مفت
اور خود شرمندہ ہوکر جائے گا
عیب سے خالی، نہ واعظ ہے نہ ہم
ہم پہ منہ آئے گا، مُنہ کی کھائے گا
دِل کے تیور ہی کہے دیتے تھے صاف
رنگ یہ دِیوانہ اِک دِن لائے گا
باغ و صحرا میں رہے جو تنگ دِل
جی قفس میں اُس کا کیا گبھرائے گا
رنگ گردوں کا ہے کچھ بدلا ہُوا
شعبدہ تازہ کوئی دِکھلائے گا
ابر و برق آئے ہیں دونوں ساتھ ساتھ
دیکھیے برسے گا یا برسائے گا
مشکلوں کی جس کو ہے حالی خبر
مُشکلیں آساں وہی فرمائے گا
شاعر: الطاف حسین حالی
(دیوانِ حالی: مرتبہ؛ رشید حسن خان،سالِ اشاعت،1987)
Kab Tak Ay Abr-e-Karam Tarsaaey Ga
Meenh Bhi Rehmat Ka Kabhi Barsaaey Ga
Phal Kuch Ay Nakhl-e- Wafa Tujh Men Nahen
Jo Lagaaey Ga Pachhtaaey Ga
Dost Ka Aaya Hi Samjho Kuch Payaam
Aaj Agar Aaya Nahen Kall Aaey Ga
Zaoq Sab Jaatay Rahay Juzz Zaoq -e- Dard
Ik Yeh Lapka Dekhiay Kab Jaaey Ga
Waaiz Aata Hay To Aanay Do Usay
Par Maza Aanay Ka Yahaan Kaya Paaey Ga
Aaey Ga Aor Ham Ko Sharmaaey Ga Muft
Aor Khud Sharminda Ho Kar Jaaey Ga
Aib Say Khaali Na Waaiz Hay , Na Ham
Ham Pe Munh Aaey Ga Munh Ki Khaaey Ga
Dil K Taiwar Hi Kahay Detay Thay Saaf
Rang Yeh Dewaana Ik Din Laaey Ga
Baagh -o - Sehra Men Rahay Jo Tang Dil
Ji Qafas Men Uss Ka Kaya Ghabraaey Ga
Rang Gardoon Ka Hay Kuchh Badla Hua
Shobda Taaza Koi Dikhlaaey Ga
Abr -o- Barq Aaey Hen Dono Saath Saath
Daikhiay Barsay Ga Ya Barsaaey Ga
Mushkalon Ki Jiss Ko Hay HALI Khabar
Mushkalen Asaaan Wahi Farmaaey Ga
Poet: Altaf Hussain Hali