رنج اور رنج بھی تنہائی کا | الطاف حسین حالی|
رنج اور رنج بھی تنہائی کا
وقت پہنچا مری رسوائی کا
عمر شاید نہ کرے آج وفا
کاٹنا ہے شب تنہائی کا
تم نے کیوں وصل میں پہلو بدلا
کس کو دعویٰ ہے شکیبائی کا
ایک دن راہ پہ جا پہنچے ہم
شوق تھا بادیہ پیمائی کا
اس سے نادان ہی بن کر ملیے
کچھ اجارہ نہیں دانائی کا
سات پردوں میں نہیں ٹھہرتی آنکھ
حوصلہ کیا ہے تماشائی کا
درمیاں پائے نظر ہے جب تک
ہم کو دعویٰ نہیں بینائی کا
کچھ تو ہے قدر تماشائی کی
ہے جو یہ شوق خود آرائی کا
اس کو چھوڑا تو ہے لیکن اے دل
مجھ کو ڈر ہے تری خود رائی کا
بزم دشمن میں نہ جی سے اترا
پوچھنا کیا تری زیبائی کا
یہی انجام تھا اے فصل خزاں
گل و بلبل کی شناسائی کا
مدد اے جذبۂ توفیق کہ یہااں
ہو چکا کام توانائی کا
محتسب عذر بہت ہیں لیکن
اذن ہم کو نہیں گویائی کا
ہوں گے حالیؔ سے بہت آوارہ
گھر ابھی دور ہے رسوائی کا
شاعر: الطاف حسین حالی
(دیوانِ حالی: مرتبہ؛ رشید حسن خان،سالِ اشاعت،1987)
Ranj Aor Ranj Bhi Tanhaai Ka
Waqt Pahuncha Miri Ruswaai Ka
Umr Shayad Na Karay Aaj Wafa
Kaatna Hay Shab -e- Tanhaai Ka
Tum Nay Kiun Wasl Men Pehlu Badla
Kiss Ko Daawa Hay Shakaibaai Ka
Aik Din Raah Par Ja Pahunchay Ham
Shaoq Tha Baadya Paimaai Ka
Uss Say Nadaan Hi Ban Kar Miliay
Kuch Ajaara Nahen Daanaai Ka
Saat Pardon Men Nahen Thehrti Aankh
Hosla Kaya Hay Tamashaai Ka
Darmiyaan Paa-e- Nazar Hay Jab Tak
Ham Ko Daawa Nahen Beenaai Ka
Kuch To Hay Qadr Tamashaai Ki
Hay Jo Yeh Shaoq Khud Araai Ka
Uss Ko Chhorra To Hay Lekin Ay Dil
Mujh Ko Dar Hay Tiri Khudaraai Ka
Bazm-e- Dushman Men Na Ji Say Utra
Poochna Kaya Tiri Zaibaai Ka
Yahi Anjaam Tha Ay Fasl-e- Khizaan
Gul -o-Bulbul Ki Shanasaai Ka
Madad Ay Jazba-e- Taofeeq Keh Yahan
Ho Chuka Kaam Tawanaai Ka
Mohtasib Uzr Bahut Hen Lekin
Izn Ham Ko Nahen Goyaai Ka
Hon Gay HALI Say Bahut Awaara
Ghar Abhi Door Hay Ruswaai Ka
Poet: Altaf Hussain Hali