پی پی نے کراچی کے 2کالجز ہتھیانے کی تیاری کرلی،خواجہ اظہار
کراچی(اسٹاف رپورٹر)ایم کیو ایم پاکستان کے رہنما خواجہ اظہار الحسن نے کہا ہے کہ سندھ حکومت صوبے کا کوئی ایک ایسا اسپتال ہی بتادیں جو خالصتا صوبائی حکومت کے فنڈز سے چل رہا ہو حکومت سندھ سوچی سمجھی سازش کے تحت کراچی والوں پر شب خون مار رہی ہے، سندھ حکومت نے کراچی کے مزید دو کالجز ہتھیانے کی تیاری کرلی ہے۔ایم کیو ایم پاکستان کے رہنما خواجہ اظہار الحسن نے میڈیا سے گفتگو میں کہا کہ پیپلز پارٹی ایم کیو ایم سے نفرت رکھے لیکن کراچی کو تباہ نہ کرے، اسپتالوں کے بعد اب سندھ حکومت کراچی کے مزید دو کالجز ہتھیانے کی تیاری کرلی ہے۔ ایم کیو ایم رہنما نے کہا کہ سندھ حکومت صوبے کا کوئی ایک ایسا اسپتال بتادیں جو خالصتا صوبائی حکومت کے فنڈز سے چل رہا ہوں۔ سندھ کے سرکاری اسپتالوں میں ایمرجنسی سہولیات تک موجود نہیں ہیں۔خواجہ اظہار الحسن نے کہا کہ کراچی کی ترقی میں اٹھارویں ترمیم سب سے بڑی رکاوٹ ہے،حکومت سندھ چاہتی ہی نہیں کہ کراچی ترقی کرے میں سندھ پبلک کمیشن میں موجود اپنے ممبر سے کہتا ہوں کہ فوری ادارے کو لات مارکر عوام کے لئے باہر آجائے جلد اس معاملے پر بھی ہم عدالت میں آواز بلند کرینگے۔
