مونگ پھلی نوں آکھے اِک پیا پستے دی بھرجائی

مونگ پھلی نوں آکھے اِک پیا پستے دی بھرجائی
مونگ پھلی نوں آکھے اِک پیا پستے دی بھرجائی

  

سبزی، مرچ، مسالے اتوار بازارے ویکھے

کیسے کیسے عجب نظارے اتوار بازار ےدیکھے

سارے بند بازار تے کھلا ایہہ بازار نرالا

مسجد دا ہمسایہ میلہ چوکھی رونق والا

ہم ہما کے آیا ایتھے سارا آل دُوالا

ابا، چاچا، تایا، پھپھا، امی، باجی، خالہ

لوگ ولائتی دیسی سارے اتوار بازارے ویکھے

کیسے کیسے عجب نظارے اتوار بازارے ویکھے

رنگ برنگی کاراں والیاں دیاں لگیاں ہویاں نے پالاں

ہر کوئی ایتھے میرے وانگوں ڈُبا ہویا وچ خیالاں

کیہڑی چیز خریداں ایتھوں کیویں ویلا ٹالاں

اوتھے چوکھی بھیڑ پئی اے جیہڑی تھانویں دالاں

مٹی تھوہڑ ، غبار تے رنگ برنگے غبارے اتوار بازارے ویکھے

کیسے کیسے عجب نظارے اتوار بازارے ویکھے

کیہڑی شے نہیں ویکھی ایتھے ویکھے سوئے لال ہدوانے

ایس بازار وکدے ویکھے اساں مکئی دے دانے

ون سوَنے ویکھے ایتھے کمبل، لیف تے سرہانے

کاراں دے وچ ڈکے ہوئے ڈٹھے بال ایانے

ہسدے، روندے تے کُرلاندے بال وچارے ویکھے

کیسے کیسے عجب نظارے اتوار بازارے ویکھے

لنڈے ددا سامان خریدن لوکیں ڈردے ڈردے

ہنڈے، ورتے کورٹ، سویٹر چکدے، ویندے دھردے

فیشن نوں نبھاوندے پئے لوکیں سستے چارے کردے

گھر دا پڑدہ رکھن لئی پئے لین پرانے پڑدے

اوور کوٹ، جراباں، شالاں سودے سارے ویکھے

کیسے کیسے عجب نظارے اتوار بازارے ویکھے

نویں نرالی جھب دی جس نے جو آواز لگائی 

کہے پیا ملوکاں والا بھائی کشمش وِکنے آئی

مونگ پھلی نوں آکھے اِک پیا پستے دی بھرجائی

گنے ویچن والا پیا واجاں مارے لٹی گئی مٹھیائی

برفی دی آواز سنی تے لبھے شکر پارے ویکھے

کیسے کیسے عجب نظارے اتوار بازارے ویکھے

کوئی جوس اناراں دا نوش پیا فرماوے

کوئی ککڑی ذبح کرا کے تھیلے وچ پیا پاوے

کوئی گاہک ہزاراں دا قالین خریدی جاوے

خالی جیباں والے کیں اکھیاں سیکی جاندے

مہاتڑ ساتھی ورگے کئی اتوار بازارے ویکھے

کیسے کیسے عجب نظارے اتوار بازارے ویکھے

شاعر:امام دین گجراتی

مزید :

شاعری -سنجیدہ شاعری -