ذیابیطس سے چھٹکارا پانے کا آسان نسخہ!
رمیثہ الحق ہاشمی
خشک پھلوں یا میوہ جات کا استعمال کافی زیادہ ہوتا ہے مگر کیا ان سے صحت کو کوئی فائدہ ہوتا ہے؟اگر آپ خشک میوے کھانے کے عادی ہیں تو یہ عادت ذیابیطس ٹائپ 2 جیسے دائمی مرض سے متاثر ہونے کا خطرہ کم کر سکتی ہے۔یہ بات ایک نئی طبی تحقیق میں سامنے آئی۔جرنل بی ایم سی نیوٹریشن اینڈ میٹابولزم میں شائع ہونے والی تحقیق میں دریافت کیا گیا کہ خشک پھلوں کی کچھ مقدار کا روزانہ استعمال ذیابیطس ٹائپ 2 سے متاثر ہونے کا خطرہ نمایاں حد تک کم کر دیتا ہے۔خشک پھل یا میوہ جات ذائقے میں بہترین ہونے کے ساتھ ساتھ صحت کے لیے مفید ہوتے ہیں۔اس تحقیق میں خشک آلو بخارے، خشک خوبانی اور کشمش کے استعمال کے اثرات کی جانچ پڑتال کی گئی تھی۔تحقیق کے لیے 5 لاکھ افراد کے ڈیٹا کی جانچ پڑتال کی گئی۔جس کے دوران ان افراد سے سوالنامے بھروائے گئے تاکہ معلوم ہو سکے کہ وہ روزانہ کتنی مقدار میں خشک میوہ جات کا استعمال کرتے ہیں۔ان افراد کے ڈیٹا کا موازنہ ذیابیطس کے شکار 61 ہزار سے زائد افراد جبکہ 6 لاکھ کے قریب افراد پر مشتمل کنٹرول گروپ کے ڈیٹا سے کیا گیا۔جس کے نتائج سے معلوم ہوا کہ خشک میوہ جات کا استعمال ذیابیطس سے تحفظ کے لیے بہترین ہوتا ہے۔درحقیقت روزانہ ان کی کچھ مقدار کے استعمال سے ذیابیطس ٹائپ 2 سے متاثر ہونے کا خطرہ 60 فیصد تک کم ہو جاتا ہے۔ ماہرین نے بتایا کہ خشک پھلوں میں تازہ پھلوں کے مقابلے میں کاربوہائیڈریٹس کی مقدار کافی زیادہ ہوتی ہے، تو ان کی زیادہ مقدار کے استعمال سے گریز کرنا چاہیے۔انہوں نے بتایا کہ خشک میوہ جات کے استعمال سے تکسیدی تناؤ میں کمی آتی ہے جس سے جسم کے لیے خون میں موجود شکر کو کنٹرول کرنا آسان ہو جاتا ہے۔ان کا کہنا تھا کہ خشک پھلوں میں فائبر اور ایسے ضروری غذائی اجزاء موجود ہوتے ہیں جو صحت کے لیے مفید ہوتے ہیں جو جسم میں غذائی توازن بہتر بناتے ہیں۔انہوں نے مشورہ دیا کہ خشک میوہ جات کا اعتدال میں رہ کر استعمال کرنا چاہیے اور ان کے ساتھ تازہ پھلوں اور سبزیوں کو بھی غذا کا حصہ بنانا چاہیے۔
