سابق بھارتی فاسٹ باؤلر عرفان پٹھان نے محمد عامر کی ریٹائرمنٹ پر کیا کہا؟
لاہور (ڈیلی پاکستان آن لائن) بھارتی کرکٹ ٹیم کے سابق آل راؤنڈر عرفان پٹھان نے قومی کرکٹر محمد عامر کے کرکٹ مینجمنٹ سے مایوس ہو کر کرکٹ کو الوداع کہنے کے فیصلے پر ردعمل دیتے ہوئے کہا ہے کہ فاسٹ باؤلر کیلئے ابھی بہت سی کرکٹ باقی ہے۔
تفصیلات کے مطابق عرفان پٹھان نے ٹوئٹر پر جاری اپنے ایک پیغام میں محمد عامر کو ٹیگ کرتے ہوئے کہا کہ ’حال ہی میں لنکا پریمیر لیگ (ایل پی ایل) میں میرا عامر سے سامنا ہوا۔ عامر کے کرکٹ چھوڑنے کے فیصلے کے حوالے سے میں یہ ضرور کہوں گا کہ عامر کیلئے ابھی بہت سی کرکٹ باقی ہے، عامر اب بھی اچھے باؤلر ہیں، میری خواہش ہے ان کا مستقبل بھی اچھا ہو۔“
Just faced this guy @iamamirofficial in the recent concluded #Lpl must say lots of cricket left in him. Bowling well as ever. Wish him well for future #amirretires
— Irfan Pathan (@IrfanPathan) December 17, 2020
اس سے قبل پاکستان کرکٹ ٹیم کے سابق فاسٹ باؤلر شعیب اختر نے محمد عامر کی طرف سے انٹرنیشنل کرکٹ چھوڑنے کے فیصلے پر ردعمل دیتے ہوئے کہا کہ عامر کو میرے حوالے کردیں اور پھر جادو دیکھیں، یوں ضائع نہ کریں۔
واضح رہے کہ محمد عامر نے قومی کرکٹ ٹیم کی مینجمنٹ سے مایوس ہو کر کرکٹ چھوڑنے کا فیصلہ کیا ہے جن کا کہنا ہے کہ مجھے ذہنی طور پر ٹارچر کیا جارہا ہے، اتنا ذہنی دباؤبرداشت نہیں کرسکتا ، موجودہ ٹیم مینجمنٹ مجھے کھیلانا نہیں چاہتی، فی الحال اس مینجمنٹ کی وجہ سے کرکٹ چھوڑ رہا ہوں۔
دوسری جانب پی سی بی نے عامر کے ریٹائرمنٹ کے فیصلے کو ذاتی فیصلہ قرار دیتے ہوئے کہا کہ آئندہ کسی بھی انٹرنیشنل میچ کیلئے محمد عامر کے نام پر غور نہیں کیا جائے گا۔