لاہور قلندرز کے باؤلر حارث رؤف شہرت ملنے سے پہلے کیا کرتے رہے اور پی ایس ایل میں کیا کارنامہ سرانجام دینا چاہتے ہیں؟ جان کر آپ دل کھول کر داد دیں گے
دبئی (ڈیلی پاکستان آن لائن) پاکستان سپر لیگ (پی ایس ایل) کے میچ میں کراچی کنگز کیخلاف 4 وکٹوں کی شاندار کارکردگی کا مظاہرہ کر کے لاہور قلندرز کو فتح دلانے والے باﺅلر حارث رﺅف کا کہنا ہے کہ وہ پی ایس ایل کی تاریخ میں تیز ترین گیند کروانا چاہتے ہیں۔
تفصیلات کے مطابق راولپنڈی کے اس نوجوان فاسٹ باﺅلر نے پارٹ ٹائم سیلزمین کے طور پر ایک دکان میں بھی کام کیا ہے اور ساتھ ساتھ سڑکوں پر ٹیپ بال کرکٹ بھی کھیلی ہے لیکن کئی والدین کی طرح حارث کے والدین بھی ان کے اس شوق کے خلاف تھے۔حارث رؤف کو کرکٹ کا جنون گوجرانوالہ لے گیا جہاں لاہور قلندرزکے رائزنگ سٹارز پروگرام کے تحت ٹرائلز ہو رہے تھے اور وہاں انہوں نے تیز ترین بولنگ کا مظاہرہ کیا۔
لاہور قلندرز کے کوچ عاقب جاوید نے ان میں چھپا ہوا ٹیلنٹ دیکھ لیا اور وہیں سے حارث رؤف کا کرکٹ کے کیرئیر کا باقاعدہ سفر شروع ہوا۔ لاہور قلندرز فرنچائز نے حارث رؤف کو اپنے اسی ڈویلپمنٹ پروگرام کے تحت آسٹریلیا بھیجا جہاں ان کی صلاحیتوں سے مقامی کلب ہاکسبری نے بھی فائدہ اٹھایا اور کھیلنے کا کنٹریکٹ کیا۔اسی آسٹریلوی دورے میں حارث رؤف کو بھارتی کرکٹ ٹیم کی نیٹ پریکٹس میں بلایا گیا جہاں انہوں نے ویرات کوہلی سمیت متعدد بیٹسمینوں کو باﺅلنگ کی۔
ابوظہبی میں ہونے والے ٹی 20 کپ کے فائنل میں لاہور قلندر نے جنوبی افریقہ کی ٹیم ٹائٹن کو شکست دی جس کی ایک بڑی وجہ حارث کی باﺅلنگ تھی جنہوں نے آخری اوور کرتے ہوئے کرس مورس اور ایلبی مورکل جیسے بلے بازوں کو جیت کیلئے درکار انیس رنز نہیں بنانے دئیے۔
حارث رؤف اپنے آئیڈیل باﺅلر شعیب اختر کی طرح تیز بولنگ کے شوقین ہیں اور رواں پی ایس ایل 150 کلومیٹر فی گھنٹہ کی رفتار سے گیند کروانا چاہتے ہیں۔ کوچ عاقب جاوید کا کہنا ہے کہ حارث رﺅف مستقبل کے سپرسٹار ہیں اور ان میں دنیا کا تیز ترین باﺅلر بننے کی صلاحیت موجود ہے۔
