’واٹس ایپ پر یہ میسج آئے تو فوراً ڈیلیٹ کردیں‘ ماہرین نے وارننگ دے دی، بڑے نقصان کے بارے میں خبردار کردیا
سان فرانسسکو(نیوز ڈیسک)دنیا بھر میں استعمال ہونے والی مقبول ترین میسجنگ سروس ’واٹس ایپ‘ کے صارفین کو دھوکہ دے کر لوٹنے والے شعبدہ باز ایک بار پھر سرگرم ہو چکے ہیں۔ اگرچہ یہ سروس دنیا بھر میں مفت دستیاب ہے لیکن اس کے باوجود کچھ جعلساز صارفین کو میسج بھیجتے ہیں کہ واٹس ایپ سروس کو جاری رکھنے کے لئے انہیں سبسکرپشن کی رقم ادا کرنی ہوگی اور اطلاعات ہیں کہ بڑے پیمانے پر واٹس ایپ صارفین اس فراڈ کا شکار ہورہے ہیں۔
میل آن لائن کے مطابق اس دھوکہ بازی کا اصل مقصد صارفین سے ادائیگی کے متعلق ذاتی نوعیت کی معلومات حاصل کرنا ہے جو بعد میں ان کے بینک اکاﺅنٹ خالی کرنے کا سبب بن سکتی ہے۔ تفصیلات کے مطابق واٹس ایپ صارفین کو ایک میسج بھیجا جاتا ہے جس میں انہیں بتایا جاتا ہے کہ ان کی مفت سروس کا سلسلہ ختم ہوچکا ہے اور اگر وہ مزید اس سروس کا استعمال جاری رکھنا چاہتے ہیں تو سبسکرپشن کی فیس ادا کرنا ہوگی۔ یہ میسج عموماً ان الفاظ پر مشتمل ہوتا ہے ”آپ کی سبسکرپشن ایکسپائر ہوچکی ہے۔ اپنا اکاﺅنٹ ویری فائی کرنے کے لئے اور لائف ٹائم سبسکرپشن خریدنے کے لئے اس لنک پر کلک کریں۔“
لنک پر کلک کرنے والے صارفین کو لائف ٹائم سبسکرپشن کے لئے پیمنٹ کی معلومات فراہم کرنے کو کہا جاتا ہے، جو بعدازاں مالی فراڈ کے لئے استعمال کی جاتی ہیں۔ سائبر سکیورٹی کے ماہرین کا کہنا ہے کہ اگر آپ کو کوئی ایسا میسج موصول ہو تو اسے فوری طور پر ڈیلیٹ کردیں۔ اگر آپ اس میں دئیے گئے لنک پر کلک کرچکے ہیں تو ضروری ہے کہ آپ کسی اینٹی وائرس سافٹ ویئر کے ذریعے اپنے ڈیوائس پر ڈاﺅن لوڈ ہونے والے نقصان دہ سافٹ ویئر کا خاتمہ کریں۔