بھارتی اداکارہ ادیتی سنگھ پاکستان کے دورے پر بے حد خوش
لاہور(فلم رپورٹر)بھارتی اداکارہ ادیتی سنگھ اپنے پاکستان کے دورے پر بے حد خوش ہیں، جن کا ماننا ہے کہ پاکستانیوں نے انہیں بہت محبت دی اور انہیں ایسا محسوس ہی نہیں ہورہا کہ وہ اپنے ملک کے بجائے کسی اور ملک میں موجود ہیں۔ادیتی سنگھ کراچی پریس کلب میں رکھی ایک میٹنگ کا حصہ بنیں، جہاں انہوں نے بتایا کہ وہ خود کو خوش قسمت مانتی ہیں کہ انہیں اتنی محبت ملی ہے۔یاد رہے کہ ادیتی سنگھ نے جاوید شیخ کی ہدایات میں بننے والی فلم ’وجود‘ میں اہم کردار نبھایا ہے۔ادیتی سنگھ نے پریس کلب میں رکھی اس میٹنگ میں اداکارہ میرا کا ان کا ساتھ دینے پر بھی اپنی خوشی کا اظہار کیا۔میرا وہ پہلی اداکارہ ہیں جنہوں نے جاوید شیخ کی فلم وجود کی کاسٹنگ کے اعلان کے بعد کہا تھا کہ جاوید شیخ نے کسی گڑیا جیسی لڑکی کو اپنی فلم میں کاسٹ کیا ہے۔ادیتی سنگھ کا میڈیا سے بات کرتے ہوئے کہنا تھا کہ ’میں نے پاکستان میں اب تک جو کچھ بھی حاصل کیا اس کی ایک وجہ میڈیا کا مجھے بڑھاوا دینا ہے، میڈیا کا سپورٹ نہ ہو تو ہم فنکار کچھ بھی نہیں ہیں۔
انہوں نے یہ بھی بتایا کہ ان کے مامو اداکار ادیتیے پنچولی نے کہا تھا کہ وہ جب بھی پاکستان جائیں گی انہیں وہاں بیحد محبت ملے گی، کیوں کہ انہیں بھی وہاں ہمیشہ پیار ہی ملا۔ادیتی کے مطابق انہیں ایسا محسوس ہی نہیں ہوتا کہ وہ اپنے گھر میں نہیں ہیں، کیوں کہ یہاں موجود کئی گھرانوں نے اپنے گھر کا حصہ بنایا۔ادیتی سنگھ نے پاکستانی فنکار علی ظفر، حمزہ علی عباسی اور میرا کے ساتھ کام کرنے کی خواہش کا اظہار بھی کیا۔خیال رہے کہ ادیتی سنگھ نے تیلگو فلم ’گپیدانتھ پریم‘ کے ساتھ کیریئر کا آغاز کیا، جس کے بعد پاکستان آنے سے قبل انہوں نے ایک اور تیلگو فلم ’نینو کڈنیپ لیانو‘ میں کام کیا تھا۔
