لاہورہائیکورٹ کے گرد تجاوزات کاکیس سماعت کیلئے پیش کرنیکا حکم
لاہور(نامہ نگارخصوصی)لاہورہائیکورٹ کے اردگرد نا جائز تجاوزات کو ختم کرنے اور صفائی ستھرائی کروانے کیلئے متفرق درخواست پر عدالت نے26 جنوری کو کیس سماعت کے لیے پیش کرنے کا حکم دے دیا۔ جسٹس شمس محمود مرزا نے سابق گورنر پنجاب سردار لطیف کھوسہ کی درخواست پر سماعت کی، درخواست میں پنجاب حکومت ،سٹی ڈسٹرکٹ گورنمنٹ سمیت دیگر کو فریق بنایا گیا ہے، سابق گورنر پنجاب کے وکیل نے موقف اپنایاکہ ہائیکورٹ کے گرد تجاوزات کی بھرمار ہے اور صفائی ستھرائی کا مناسب انتظام نہیں ہے اورٹریفک وارڈن تعینات نہ ہونے کی وجہ سے ٹریفک کی روانی متاثر ہورہی ہے، وکیل نے مزید موقف اپنایاکہ سٹی گورنمنٹ اور ٹریفک پولیس سمیت دیگر ادارے اپنا کام نہیں کر رہے ہیں، درخواست گزار سابق گورنر پنجا ب نے استدعاکی کہ عدالت سٹی ڈسٹرکٹ گورنمنٹ کو ہائیکورٹ کے گرد تجاوزات ختم کروانے کا حکم دے۔
