حکومتی وزراء کو اخلاق سے عاری گفتگو زیب نہیں دیتی،بگڑ ے سیاستدانوں کو اخلاقیات کی اکیڈمی جوائن کرنی چاہئے :طلال چوہدری
فیصل آباد (ڈیلی پاکستان آن لائن) پاکستان مسلم لیگ ن کے مرکزی رہنما اور سابق وفاقی وزیر مملکت طلال چوہدری نے کہا ہے کہ حکومتی وزراء کو اخلاق سے عاری گفتگو زیب نہیں دیتی،اگر ایسا ہوتا رہا تو بدقسمتی سے سیاستدانوں بارے لوگوں کا اعتماد اٹھ جائیگا، بگڑ ے ہوئے سیاستدانوں کو اخلاقیات کی اکیڈمی جوائن کرنی چاہئے، سیاستدانوں پر کیچڑ اچھالنا پارلیمنٹ اور عوامی نمائندوں کی تضحیک ہے۔
میڈیا سے گفتگو کرتے ہوئے سینئر مسلم لیگی رہنما طلال چوہدری کا کہنا تھاکہ پی ٹی آئی کو ایسے شخص کی ضرورت ہے جو بار بار جھوٹ بولنا جانتا ہو، سیاست میں بداخلاق اور بدتمیز ہو ، پگڑی اچھالنے کاماسٹر ہو اور یوٹرنوں کاسونامی اور چاپلوسوں کا آئی جی ہو ، ایسے بد تمیز شخص کو عمران خان صاحب شاباش دیتے ہیں ۔انہوں نے کہا کہ اسوقت ملک شدید بحرانوں کاشکار ہے ،روزبروزعوام مہنگائی بیروزگاری کی چکی میں پس رہے ہیں اور حکومتی وزاراء کو صرف ذاتیات پر مبنی کرپشن کے الزامات اور نت نئے ہتھکنڈوں سے فرصت نہیں ہے۔ طلال چوہدری نے کہا کہ حکومت وقت نے اپنے اقتدار کے پانچ ماہ مکمل کر لئے ہیں مگر ابھی تک انہوں نے عوام کو برداشت کرنے اور صبر کا لولی پاپ دے رکھا ہے۔
