بھارت مقبوضہ کشمیر میں انسانی حقوق کی خلاف ورزیاں اور قتل عام روکے

ٹورنٹو(آئی این پی )بین الاقوامی کشمیر یکجہتی کانفرنس نے کشمیریوں پر جاری انسانی حقوق کی سنگین خلاف ورزیوں ہلاکتوں اور تشدد کے واقعات کا نوٹس لیتے ہوئے قرار داد منظور کر لی جس میں مطالبہ کیا گیا ہے کہ بھارت مقبوضہ کشمیر میں انسانی حقوق کی خلاف ورزیوں اور قتل عام روکے،بھارت اپنی تمام افواج کا انخلا کرے تاکہ اقوام متحدہ کی قراردادوں کے مطابق وہاں رائے شماری کرائی جاسکے،اسلامی سربراہ کونسل کے سیکرٹری جنرل جموں وکشمیر میں انسانی حقوق کی خلاف ورزیوں پر رپورٹ بنائیں، عالمی میڈیا اپنی ذمہ داریوں کو پورا کرتے ہوئے جمو ں و کشمیر کے لوگوں کی محرومیوں کو دنیا کے سامنے پیش کرے۔بین الاقوامی کشمیر یکجہتی کانفرنس نے کینیڈا میں قرار داد منظور کی جس میں کشمیریوں پر جاری انسانی حقوق کی سنگین خلاف ورزیوں خاص طور پر 8جولائی 2016 ء کو کشمیری مجاہد برہان وانی کے ماورائے عدالت قتل کے بعد شروع ہونے والی ہلاکتوں اور تشدد کے واقعات کا نوٹس لیا گیا ہے ۔بین الاقوامی کانفرنس نے بھارتی افواج کی طرف سے پیلٹ گنز کے بے دریغ استعمال کو تنقید کا نشانا بناتے ہوئے کہا کہ اس کا مقصد دانستہ طور پر پوری کشمیری نسل کو نابینا کرنا ہے۔اس بات پر زور دیا گیا کہ اقوام متحدہ کا فرض ہے کہ وہ بھارتی فوج کی طرف سے دانستہ طور پر کشمیریوں کی نسل کشی روکنے کے لیے اقدامات کرے۔ کشمیری یکجہتی کانفرنس کے شرکا نے قرار داد میں مطالبہ کیا کہ بھارت جموں وکشمیر میں انسانی حقوق کی خلاف ورزیوں اور قتل عام کو روکے۔بھارتی حکومت اقوام متحدہ کے تفتیش کاروں کو مقبوضہ کشمیر میں انسانی حقوق کے حالات کے بارے میں آگاہ کرے تاکہ بین الاقوامی انسانی حقوق کی خلاف ورزی کرنے والوں کے خلاف کاروائی کی جاسکے۔جموں وکشمیر سے بھارت اپنی تمام افواج کا انخلا کرے تاکہ وہاں کے شہری عام زندگی گزار سکے اور اقوام متحدہ کے قراردادوں کے مطابق وہاں پر رائے شماری کرائی جاسکے۔اقوام متحدہ ذمہ داری کا احساس کرتے ہوئے اپنی نگرانی میں جموں و کشمیر میں رائے شماری کرائے۔اسلامی سربراہ کونسل کے سیکرٹری جنرل جموں کشمیر میں انسانی حقوق کی خلاف ورزیوں پر رپورٹ بنائیں۔اقوام متحدہ اور دیگر عالمی ادارے بھارتی افواج کی طرف سے جموں وکشمیر میں تما م اموات ، جعلی پولیس مقابلوں کی تفتیش کریں اور ذمہ داروں کے خلاف قانون کے مطابق کاروائی کریں۔تمام حکومتوں خصوصی طور پر کینیڈین حکومت اس بات پر زور دے کہ بھارت جموں وکشمیر میں انسانی حقوق کی خلاف ورزیاں بند کرے۔ عالمی میڈیا اپنی ذمہ داریوں کو پورا کرتے ہوئے جمو ں کشمیر کے لوگوں کی محرومیوں کو دنیا کے سامنے پیش کرے۔ متعلقہ افراد جموں وکشمیر کے ہولناک واقعات سے خود کو آگاہ رکھیں اور اپنی استطاعت کے مطابق اقدامات کریں۔
کشمیر ۔ کانفرنس