شائقین کرکٹ کے لئے بڑی خوشخبری،برطانوی حکومت کا سٹیڈیم کے دروازے کھولنے کا فیصلہ،کتنے تماشائی میچوں سے لطف اندوز ہو سکیں گے؟تفصیلات جانئے
مانچسٹر(ڈیلی پاکستان آن لائن)کھیلوں کے شائقین کی سٹیڈیم واپسی کے لیے برطانوی حکومت نے اہم اعلان کر دیا۔
انگلش کرکٹ بورڈ کے مطابق آزمائشی طور پر رواں ماہ سے شائقین کی محدود تعداد کو سٹیڈیم آنے کی اجازت دی جائے گی۔محفوظ واپسی کے لیے پہلے دو کاؤنٹی کے دوستانہ میچز میں شائقین کو اجازت دی جائے گی، 26 اور 27 جولائی کو سرے بمقابلہ میڈل سیکس دوستانہ کاؤنٹی میچز میں شائقین کی کم تعداد کو سٹیڈیم آنے دیا جائے گا۔انگلش کرکٹ بورڈ نے حکومت کی جانب سے شائقین کی سٹیڈیم واپسی کی اجازت کو خوش آئند قرار دیتے ہوئے کہا ہے کہ کرکٹ کی محفوظ واپسی کے لیے حکومت کے ساتھ مل کر کام کیا ہے۔بورڈ کا کہنا ہے کہ شائقین کی میدانوں میں مکمل واپسی تک اضافی اقدامات کی ضرورت ہے تاہم آزمائشی بنیادوں پر شائقین کی واپسی میدان آباد کرنے کی طرف پہلا قدم ہے۔
واضح رہے کہ کورونا وائرس بحران کے باعث بند دروازوں کے پیچھے بنا شائقین کے کھیلی جانے والے اپنی نوعیت کی پہلی انٹرنیشنل کرکٹ سیریز کے دوران خالی سٹیڈیم میں مصنوعی تماشائیوں کا شور لگایا گیا ہے۔بورڈ حکام کے مطابق مصنوعی شور لگانے کا مقصدکھلاڑیوں کا حوصلہ بڑھانے کے لیے پہلے جیسا ماحول فراہم کرنا ہے جس کے لیے پرانے میچز کی آڈیوز کو استعمال کرنے کے لیے ایڈٹ کیا جا رہا ہے۔
