رابطہ عالمی اسلامی نے وزیراعظم عمران خان کے موقف کو امت مسلمہ کے جذبات کی ترجمانی قرار دے دیا 

رابطہ عالمی اسلامی نے وزیراعظم عمران خان کے موقف کو امت مسلمہ کے جذبات کی ...
رابطہ عالمی اسلامی نے وزیراعظم عمران خان کے موقف کو امت مسلمہ کے جذبات کی ترجمانی قرار دے دیا 

  

ریاض(ڈیلی پاکستان آن لائن)عالم اسلام کے اتحاد اور اسلامو فوبیا کے حوالہ سے وزیر اعظم پاکستان عمران خان کا موقف اور فکر قابل تحسین ہے ، رابطہ عالم اسلامی ، افغانستان میں امن کیلئے پاکستان اور افغانستان کے علماء کے تعاون سے کردار ادا کر رہی ہے ، بین المذاہب مکالمہ وقت کی ضرورت ہے،سعودی عرب کی حکومت کا 60 ہزار حجاج کیلئے اعلان شریعت اسلامیہ اور حالات کے مطابق فیصلہ ہے،رابطہ عالم اسلامی ، عالم اسلام کے علماء و مشائخ و مفتیان کا متفقہ فورم ہے،رابطہ عالم اسلامی کے ساتھ مل کر عالم اسلام کے امور کی اصلاح کیلئے جدوجہد کرنا چاہتے ہیں۔

یہ بات چیئرمین پاکستان علماء کونسل و نمائندہ خصوصی وزیر اعظم پاکستان برائے بین المذاہب ہم آہنگی و مشرق وسطیٰ حافظ محمد طاہر محمود اشرفی کی رابطہ عالم اسلامی کے سیکرٹری جنرل ڈاکٹر محمد بن عبد الکریم العیسیٰ سے ریاض میں ملاقات کے بعد اعلامیہ میں کہی گئی۔ رابطہ عالم اسلامی کے سیکرٹری جنرل ڈاکٹر محمد بن عبد الکریم العیٰسی نے کہا کہ دنیا میں پاکستان کا اہم مقام ہے اور سعودی عرب اور پاکستان کے درمیان اخوت اور محبت کے عظیم رشتے ہیں،وزیر اعظم عمران خان کے امت مسلمہ کے مسائل کے حوالے سے موقف امت مسلمہ کے جذبات کی ترجمانی ہے،رابطہ عالم اسلامی پاکستان کی حکومت ، علماء و مشائخ کے ساتھ امت مسلمہ کی وحدت اور اتحاد کیلئے اسلامک فوبیا کے خلا ف ہر سطح پر تعاون کیلئے تیار ہے۔

انہوں نے کہا کہ افغانستان پاکستان کے علماء کی رابطہ عالم اسلامی کے تحت کانفرنس امن کی اپیل اور پیغام ہے ، سعودی عرب بھی پاکستان افغانستان کی طرح امن چاہتا ہے،افغانستان میں امن کے حوالے سے پاکستان کا کردار بہت اہم ہے اور اس حوالہ سے پاکستان کی حکومت اور علماء جو کردار ادا کر رہے ہیں وہ قابل تحسین ہیں۔

چیئرمین پاکستان علماء کونسل و نمائندہ خصوصی وزیر اعظم پاکستان حافظ محمد طاہر محمود اشرفی نے کہا کہ رابطہ عالم اسلامی کی طرف مسلمانوں اور عالم اسلام کے مسائل پر توجہ اور کوششوں کا شکریہ ادا کرتے ہیں،رابطہ عالم اسلامی عالم اسلام کے مقتدر قائدین کا مضبوط فورم ہے جو اسلام کی صحیح تشریح اور عقائد کو دنیا کے سامنے لے کر آئی ہے،رابطہ عالم اسلامی کی طرف سے پاک افغان کانفرنس کی مکمل تائید و حمایت پاکستان کے علماء نے کی ہے،بین المذاہب مکالمہ وقت کی اہم ضرورت ہے،اسلامک فوبیا کے حوالہ سے وزیر اعظم پاکستان عمران خان کے موقف کی رابطہ عالم اسلامی کی طرف سے تائید و حمایت پر شکر گذار ہیں،سعودی عرب کی حکومت اور عوام نے ہمیشہ حجاج و زائرین کی خدمت کی ہے،سعودی عرب کی حکومت کی طرف سے حج کیلئے بہترین انتظامات کرنے کے اعلان کا خیر مقدم کرتے ہیں اور سعودی عرب کا اعلان شریعت اسلامیہ اور موجودہ حالات کے تناظر میں بالکل درست ہے ۔

مزید :

قومی -عرب دنیا -