لند ن (ڈیلی پاکستان آن لائن)برطانوی وزیراعظم سر کیئرسٹارمر مشرق وسطیٰ کی صورتحال پر ’کوبرا وزارتی اجلاس‘ کی صدارت کریں گے۔
ڈان نے دی ٹیلیگراف کی رپورٹ کے حوالے سے بتایا کہ برطانوی وزیرِ اعظم کینیڈا میں جی 7 اجلاس کے دوران رہنماؤں سے ملاقات کے بعد برطانیہ واپس آ رہے ہیں، خیال ظاہر کیا جارہا ہے کہ آج اسرائیل اور ایران کی صورتحال پر ایک کوبرا وزارتی اجلاس منعقد ہوگا۔
ٹین ڈاؤننگ سٹریٹ نے تصدیق کی ہے کہ اسرائیل میں سفارت خانے کے عملے کے اہلِ خانہ پہلے ہی ملک چھوڑ چکے ہیں۔
تاہم، حکومت نے برطانوی شہریوں کو مشورہ دیا ہے کہ وہ قریبی پناہ گاہ کے بارے میں مقامی ہدایات پر عمل کریں، مزید کہا گیا کہ اگر شہری بس یا ٹیکسی جیسے تجارتی ذرائع سے اسرائیل چھوڑنا چاہیں تو اردن کی سرحد پر عملہ موجود ہے۔
ایک برطانوی ترجمان نے کہا کہ اسرائیل اور مقبوضہ فلسطینی علاقوں میں موجود برطانوی شہریوں کے لیے ہمارا اہم پیغام یہ ہے کہ وہ مقامی حکام کی پناہ سے متعلق ہدایات پر عمل کریں اور دفتر خارجہ و دولتِ مشترکہ (ایف سی ڈی او) کے ساتھ اپنی موجودگی کا اندراج کرائیں۔