ممبران سالانہ ممبر شپ کی تجدید31 مارچ تک کروالیں،کراچی چیمبر
کراچی (اے پی پی):کراچی چیمبرآف کامرس اینڈ انڈسٹری (کے سی سی آئی) کے صدر محمدطارق یوسف نے تمام ممبران کو ہدایت کی ہے کہ وہ اپنی سالانہ ممبرشپ کی تجدید 31مارچ 2023 تک یا اس سے قبل کروا لیں تاکہ انہیں ممبر شپ کے حوالے سے کسی بھی قسم کی مشکلات کا سامنا نہ کرنا پڑے۔جمعہ کو جاری اعلامیہ کے مطابق انہوں نے کہا کہ ٹریڈ آرگنائزیشن ایکٹ 2013کے تحت کے سی سی آئی نے ممبرشپ کی تجدید کرانے کی آخری تاریخ 31مارچ 2023 مقرر کی ہے اورکراچی چیمبر میں سالانہ ممبرشپ کی تجدید کا عمل تیزی سے جاری ہے۔کے سی سی آئی کی جانب سے سالانہ ممبرشپ کی تجدید کے حوالے سے پہلے ہی ممبران کو ایس ایم ایس، ای میل اور خطوط ارسال کیے جاچکے ہیں جن میں ممبران کو ہدایت کی گئی ہے کہ وہ سال 2023-24 کے لیے اپنی سالانہ ممبرشپ کی تجدید مقررہ تاریخ تک کروالیں۔طارق یوسف نے کہا کہ ممبرشپ کی تجدید کے لیے مقررہ فیس کے ہمرا ہ انکم ٹیکس ریٹرن اور اگر قابلِ اطلاق ہو تو سیلز ٹیکس ریٹرن جمع کرانا ہوگا۔ مقررہ تاریخ تک تجدید نہ کرانے پر ممبرشپ معطل کردی جائے گی جس کے نتیجے میں درخواست گزار کو ممبرشپ حاصل کرنے کے پورے عمل سے دوبارہ گزرنا ہوگا۔
یہ بات قابل ذکر ہے کہ کراچی چیمبر نے فیس کی ادائیگی کے طریقہ کار کو سہل بناتے ہوئے فیس جمع کروانے کے لئے مختلف آپشنز دیئے ہیں لہذا ممبران تجدید کی فیس آن لائن بینکنگ کے ذریعے، میزان بینک یا فیصل بینک کی کسی بھی برانچ میں یا یو پیسہ ایپ کے ذریعے بھی جمع کرواسکتے ہیں اور پے آرڈر کے صورت میں فیس کراچی چیمبرمیں بھی جمع کروائی جاسکتی ہے تاہم جمع کی گئی رقم کی رسید بمع انکم ٹیکس ریٹرن کے ہمراہ کے سی سی آئی میں بھیجنا لازمی ہے۔ اگر کسی ممبر کو فیس چالان نہیں مل سکا تو وہ ممبر شپ ڈیپارٹمنٹ سے دفتری اوقات کے دوران رابطہ کر سکتا ہے۔ یہ بات قابلِ ذکر ہے کہ کراچی چیمبر میں ممبر شپ کارڈ اور سرٹیفیکیٹ کے اجرا کا عمل بھی تیزی سے جاری ہے جن کی مختلف معاملات میں ضرورت پڑ جاتی ہے۔
