پختون محب وطن، عامر میر بیان واپس لیں، پرویزالٰہی
لاہور(مانیٹر نگ ڈیسک) سابق وزیراعلیٰ پنجاب و مرکزی صدر پاکستان تحریک انصاف چودھری پرویزالٰہی سے سابق سپیکر قومی اسمبلی اسد قیصر اور سینیٹر ذیشان خانزادہ نے ملاقات کی۔ ملاقات میں موجودہ ملکی سیاسی صورتحال سمیت پنجاب اور کے پی الیکشن کے حوالہ سے تبادلہ خیال کیا گیا۔ چودھری پرویزالٰہی اور اسد قیصر نے کہا کہ پختون ہر گز دہشت گرد نہیں بلکہ محب وطن ہیں، عامر میر کے بیان سے ہماری دل آزاری ہوئی ہے یہ بات پاکستان کے مفاد میں بھی نہیں، صوبائی وزیر اطلاعات عامر میر اپنا بیان واپس لیں۔ دونوں رہنماؤں کا کہنا تھا کہ عمران خان کا سب سے بڑا کارنامہ یہی ہے کہ انہوں نے صوبوں اور عوام کے دلوں کو آپس میں جوڑ دیا ہے، عمران خان نے بڑ ی محنت سے چاروں صوبوں کے لوگوں کوبھائی چارے کی لڑی میں پرو دیا ہے، پنجاب، سندھ، بلوچستان، کے پی کے، گلگت بلتستان سب پاکستانی ہیں۔ چودھری پرویزالٰہی نے مزید کہا کہ عمران خان نے ہمیشہ قانون اور عدلیہ کا احترام کیا، نا اہل حکمران آئین کو پامال کر کے جمہوریت کو داغدار کر رہے ہیں، عمران خان کے خلاف درج مقدمات ن لیگ نے ذاتی اناکی بنیاد پر قائم کیے، نواز شریف باہر بیٹھ کر عمران خان اور عدلیہ کے خلاف مہم چلا رہے ہیں، عمران خان کے خلاف انتقامی کارروائیوں پر پاکستان سمیت پوری دنیا بھر میں لوگ سراپا احتجاج ہے، پی ڈی ایم ٹولہ صبح شام عمران خان اور پارٹی قائدین کے خلاف جھوٹے کیسز بنانے میں مصروف ہے۔ انہوں نے کہا کہ آئی ایم ایف کو بھی نا اہل حکمرانوں پر اعتماد نہیں، یہ عوام پر مہنگائی کے بم گرا کر آئی ایم ایف کو خوش کر رہے ہیں، تمام مسائل کا واحد حل صاف و شفاف الیکشن ہیں، حکمران اگر مگر چھوڑیں اور سپریم کورٹ کی ہدایت کے مطابق الیکشن وقت پر کروائیں۔
پرویزالٰہی
