زمان پارک میں دہشت گر د چھپے ہوئے ہیں، ریاست اور ادارے تحریک انصاف کو دہشتگرد جماعت کے طورپر ڈیل کرے: مریم نواز
لاہور (مانیٹرنگ ڈیسک، نیوز ایجنسیاں) مسلم لیگ (ن) کی چیف آرگنائزر اور مرکزی نائب صدر مریم نواز نے کہا ہے ریاست اگرعمران خان کو پکڑنا چاہے توپانچ منٹ کا کام نہیں، فرق یہ ہے ریاست نہیں چاہتی کوئی خون خرابہ ہو۔ان خیالات کا اظہار انہوں نے گزشتہ روز پریس کانفرنس کرتے ہوئے کیا، مریم نواز نے مزید کہا کہ بگڑا ہوا بچہ ریاست پرپوری قوت و شدت سے حملہ آورہے اور یہ آج سے نہیں 2014سے ہورہا ہے، یہ وہی لوگ ہیں جنہوں نے سپریم کورٹ کے سامنے گندے کپڑے لٹکائے تھے۔ زمان پارک میں دیکھے جانیوالے منا ظرکبھی نہیں دیکھے، پنجاب پولیس پر جس طرح حملہ کیا گیا یہ ریاست کیخلاف کھلے عام بغاوت ہے،رحیم یارخان کچے کے علاقے اورزمان پارک میں جو کچھ ہورہا ہے اس میں کوئی فرق نہیں،، کچے کے علاقے والے بھی پوری قوت کیساتھ پولیس پرحملہ کرتے ہیں۔عمران خان خواتین اوربچوں کواستعمال کررہا ہے، ریاست بیک فٹ پراس لیے ہے خون خرابہ نہیں چاہتی، اب ریاست کواداروں کیساتھ سرجوڑکربیٹھ کراس کی جماعت کوایک دہشت گرد کے طورپرڈیل کرنا چاہیے، اگریہ نہیں ہوتا تواس حکومت پربہت بڑا سوال کھڑا ہوگا۔مریم نواز نے کہا یہ بات بالکل ٹھیک ہے کہ زمان پارک میں دہشت گرد چھپے ہوئے ہیں جن کی تصاویربھی دیکھی ہیں، عوام کی حفاظت کرنا بھی ہماری ذمہ داری ہے، تحریک انصاف معصوم لوگوں کواستعمال کررہی ہے، ایسے لیڈرکوشرم آنی چاہیے جوخود چھپ کربیٹھا ہے،اگرمیرا والد ایسا ہوتا تومیرے لیے شرم کی بات ہے، لیڈرتوفرنٹ پرآکرلیڈ کرتا ہے۔ پی ٹی آئی ایک سیاسی نہیں عسکری جماعت ہے جو غیرملکیوں کے تعاون سے خانہ جنگی کا ایجنڈا لیکرچل رہے ہیں، ایک شخص نے قانون کوجوتی کے نیچے رکھا ہوا ہے، آج بھی اس کے وارنٹ معطل ہوگئے ہیں، کیا یہی سہولت نوازشریف اورباقی جماعتوں کوحاصل ہے،نہیں تو یہ تفریق کیوں؟۔مریم نواز نے الزام لگایا کہ زمان پارک میں حفاظتی تحویل میں چھپ کر بیٹھا شخص کالعد تنظیموں اور گلگت بلتستان کے وسائل کو استعمال کررہاہے، گلگت بلتستان کی پولیس کوپنجاب پولیس کے سامنے کھڑا کرنا ایک صوبے کودوسرے صوبے سے لڑانے کی سازش ہے، میں آج بھی کہتی ہوں ابھی اس کوگرفتارنہ کیا جائے، جب اسکے مقدمات کا فیصلہ ہوجائے تب اسے گرفتارکیا جائے،پہلے اس سے پیش ہونے کی انڈ رٹیکنگ لی جائے۔ میں بھی عدالت گئی لیکن قانون کا مذاق نہیں اڑایا،عمران خان کس کوبیوقوف بنارہا ہے، ٹیریان وائٹ،فارن فنڈنگ کیس جھوٹا نہیں تاخیری حربے استعمال کررہا ہے، توشہ خانہ والا کیس اگرجھوٹا ہے توعدالت کوبتاؤجھوٹا ہے۔ زلمے خلیل زاد کے بیان کا پاکستانیوں نے برا منایا ہے، آج امریکہ سے ہاتھ جوڑکرمعافی مانگ رہا ہے، جب اس کے دورمیں اپوزیشن کیخلاف انتقامی کارروائی ہورہی تھی تب زلمے خلیل زاد کونظرنہیں آیا۔ حیرت ہے آج ابرارالحق نے کہا ہمارے لوگ خودکش حملہ آوربن گئے ہیں، تمہارے اپنے بچے لندن میں گل چھرے اڑا رہے ہیں اور پاکستانی بچوں کوکہتے ہوپولیس کے جوانوں پرحملہ کرو۔بیانیہ یہ نہیں ہوتا اقتدارمیں ہو تو تعریفیں جب باجوہ چلے گئے تو کورٹ مارشل کی بات کرنا بزدل کی نشانی ہے، کیا عمران کوآرمی چیف نے کہا تھا بنکرمیں بیٹھ کرچھپ جاؤ، یہ کوئی سیاسی انتقام نہیں عدالت بلارہی ہے پیش ہوجاؤ،غیرجمہوری لوگوں کا حساب کتاب ہونا چاہیے، اگروہ احتساب سے بھاگے توانہیں پکڑکرعدالتوں میں پیش کیا جائے۔موجودہ مہنگائی پر بات کرتے ہوئے مریم نواز نے کہا مہنگائی کا ذمہ دارآئی ایم ایف سے معاہدہ کرنیوا لا شخص ہے، مہنگائی کا ہمیں احساس ہے، ہم نے ابھی الیکشن میں بھی جانا ہے اوراحساس ہے، پاکستان کی ہربیماری کی جڑعمران خان ہے، پاکستان کوبیرونی نہیں اندرونی تھرٹ ہے،مشکلات کے سارے تانے،بانے عمران سے ملتے ہیں۔
مریم نواز
