کراچی (ڈیلی پاکستان آن لائن)پاکستان سپر لیگ کے 9ویں سیزن کا فائنل آج ملتان سلطانز اور اسلام آباد یونائیٹڈ کے درمیان کراچی کے نیشنل سٹیڈیم میں آج رات 9 بجے کھیلا جائے گا۔
تفصیلات کے مطابق اسلام آباد نے دو مرتبہ ٹرافی جیتی ہے، ملتان سلطانز کے حصے میں یہ ٹائٹل ایک مرتبہ آیا ہے۔ملتان سلطانز پہلے کوالیفائر میں پشاور زلمی کو شکست دے کر فائنل میں پہنچی تھی جب کہ اسلام آباد نے ایلیمینیٹر 1 میں کوئٹہ کو ہرایا اور پھر ایلیمینیٹر 2 میں پشاور سے فتح چھینی اور فائنل تک رسائی کرنے میں کامیاب ہوئی۔فائنل میں پہنچنے والی دونوں ٹیموں کے کپتانوں محمد رضوان اور شاداب خان نے کراچی پورٹ ٹرسٹ کی تاریخی عمارت کے سامنے ٹرافی کے ساتھ تصاویر بنوائیں۔
پچ رپورٹ:
کراچی کے نیشنل بینک کرکٹ سٹیڈیم کی یہ وہی وکٹ ہے جس پر اسلام آباد یونائیٹڈ اور پشاور زلمی کے درمیان ایلیمینیٹر 2 کا مقابلہ ہوا تھا۔اس وکٹ نے بلے بازوں کو باؤنسی اور تیز گیند فراہم کی جس سے انہیں اسٹرائیک میں مدد ملی، امید ہے کہ آج بھی یہ وکٹ ایسی ہی ہوگی۔