گجرات(ڈیلی پاکستان آن لائن ) گجرات کے علاقے مراریان گاؤں میں ایک دلخراش واقعہ پیش آیا، جہاں ایک نوجوان نے ناشتے میں تاخیر پر اپنی ماں کو لوہے کی راڈ مار کر قتل کر دیا۔
پولیس ذرائع کے مطابق، عثمان نواز نے اپنی والدہ رضیہ بی بی سے ناشتہ تیار کرنے کو کہا، تاہم والدہ نے روزے کی وجہ سے کچھ دیر انتظار کرنے کو کہا۔ اس پر عثمان مشتعل ہو گیا اور اس نے لوہے کی راڈ سے اپنی ماں کے سر پر وار کر دیا، جس سے وہ موقع پر ہی جاں بحق ہو گئیں۔
واقعے کی اطلاع ملتے ہی پولیس موقع پر پہنچ گئی، ملزم کو گرفتار کر لیا اور لاش کو پوسٹ مارٹم کے لیے عزیز بھٹی شہید ٹیچنگ اسپتال منتقل کر دیا۔پولیس نے مقتولہ کے دوسرے بیٹے فرمان علی کی مدعیت میں ملزم عثمان کے خلاف تعزیرات پاکستان کی دفعہ 302 کے تحت مقدمہ درج کر لیا ہے۔