فلم’’عبداللہ‘‘ پاکستان کے سینما گھروں میں 5 جون کو ریلیز ہوگی

اسلام آباد (این این آئی)پاکستانی اداکار عمران عباس، ساجد حسن، سعدیہ خان، اور حمید شیخ کی فلم’’عبداللہ‘‘ پاکستان کے سینما گھروں میں 5 جون کو ریلیز ہوگی۔’’عبدللہ‘‘ پاکستان کی واحد فیچر فلم ہے جو اس سال کینز فلم فیسٹیول میں نمائش کے لئے پیش کی جائے گی۔90 منٹ کے دورانیہ کی اس فلم کی کہانی 17 مئی 2011 کو کوئٹہ کے علاقے خروٹ آباد میں پیش آنے والے ایک واقعہ کے گرد گھومتی ہے جس کے دوران ایک سیکیورٹی چیک پوسٹ پر ایف سی کی جانب سے دہشتگرد قرار دینے کے بعد پانچ روسی و تاجک شہریوں کو ہلاک کردیا گیا تھا۔اس واقعہ کو ایک صحافی نے کیمرے کی آنکھ میں محفوظ کرلیا اور اس فوٹیج کے بعد اس واقعے پر کافی قیاس آرائیاں بھی سامنے آئیں۔’’عبداللہ‘‘ اس مضمون پر بننے والی پہلی فلم ہے جو بین الاقوامی میڈیا کی جانب سے اس واقعے پر اٹھنے والے سوالات کے جوابات دینے کا ارادہ رکھتی ہے۔