برطانوی کمپنی نے ٹیوٹا سے 5ہزارہنرمندمانگ لیے:عرفان قیصرشیخ

برطانوی کمپنی نے ٹیوٹا سے 5ہزارہنرمندمانگ لیے:عرفان قیصرشیخ

لاہور ( کامرس رپورٹر): برطانیہ کی معروف پیپلز فرسٹ کمپنی نے ٹیوٹا سے ہاسپٹیلیٹی اور سیلزمین تربیت یافتہ 5ہزار نوجوانوں کو اپنے ملک میں روزگار کی ڈیمانڈ کر لی۔ ٹیوٹا صوبہ پنجاب کے نوجوانوں کوان کی ضروریات کے مطابق ہنر سیکھا کر انکی خدمات فراہم کرے گی۔بیروزگار نوجوانوں کو مقامی و بین الاقوامی مارکیٹ کی ضروریات کے مطابق تیار کرنااولین ترجیحات میں شامل ہے۔صوبہ پنجاب خصوصا دیہاتی علاقوں میں ٹیکنیکل ایجوکیشن اینڈ ووکیشنل ٹریننگ سسٹم کے فروغ کیلئے ٹیوٹاکوغیر ملکی فنی معاونت کا حصول بہت مدد گار ثابت ہو گا کیونکہ ملک و قوم کا مستقبل ہنر مندافرادی قوت کی دستیابی سے ممکن ہے۔ٹیوٹا کو اس وقت ورلڈ بینک، ایشین ڈویلپمنٹ بینک، جائیکا،جی آئی زیڈ، ترک کمپنیاں اور برٹش اداروں کا فنی تعلیم کے فروغ کیلئے بھرپور تعاون حاصل ہے۔ان خیالات کا اظہار چیئر پرسن ٹیوٹا عرفان قیصر شیخ نے برٹش کونسل کی پیپلز فرسٹ کمپنی کے وفد کی سربراہ جین ریکس وردی کے ساتھ گفتگو کرتے ہوئے کیا ۔ اس موقع پر ہیڈ آف پنجاب ریجن ایڈوائزر برٹش بزنس سینٹر وقار اللہ اور سینئر سیکٹر ایڈوائزر برٹش بزنس سینٹر بھی موجود تھے۔عرفان قیصر شیخ نے کہا کہ وزیر اعلی پنجاب محمد شہباز شریف صوبہ بھر میں فنی تعلیم اور ووکیشنل ٹریننگ سسٹم کے فروغ کیلئے بھرپور دلچسپی لے رہے ہیں اور انکی ہدایات کی روشنی میں تمام تراقدامات کئے جا رہے ہیں۔

صوبہ پنجاب کی ترقی کا خواب ہنر مند افرادی قوت کے بغیر ممکن نہیں ہے۔ ہاسپٹیلیٹی ، ڈرائیونگ، فوڈ اینڈ بیوریجز، کنسٹرکشن اور دیگر اہم شعبوں میں بیروزگار نوجوانوں کو تربیت دی جا رہی ہے کیونکہ ان شعبوں میں ہنر مندافرادی قوت کی اشد ضرورت ہے۔برٹش کونسل کی پیپلز فرسٹ کمپنی کے وفد کی سربراہ جین ریکس وردی نے کہا کہ ہماری کمپنی بین الاقوامی مہارت، بزنس سپورٹ، کسٹمر سروس، آن لائن سکلز، ٹرینرز کی تربیت، سٹاف کی نگرانی اور لیڈر شپ پروگرام میں کنسلٹنسی فراہم کر رہی ہے۔ہماری کمپنی کاروباری ترقی اور صارف کے ساتھ بہتر روابط کے حوالے سے کاروباری اداروں کیلئے پروگرام بھی تیار کر تی ہے۔ انہوں نے ٹیوٹا کی صوبہ پنجاب میں فنی تعلیم کے فروغ کیلئے کئے گئے اقدامات کو سراہا۔

مزید : کامرس


loading...