پنجاب اور خیبرپختونخوا میں آج بھی بارش،بیشتر اضلاع میں سیلابی صورتحال،خانپور میں پانی داخل
لاہور (مانیٹرنگ ڈیسک) پنجاب اور خیبر پختونخوا کے مختلف علاقوں میں آج بھی بارش کا امکان ظاہر کیا جا رہا ہے لیکن کراچی میں بادل نہیں برسیں گے۔محکمہ موسمیات کے مطابق آج اسلام آباد، راولپنڈی، لاہور، فیصل آباد اور گوجرانوالہ میں بارش متوقع ہے جبکہ پشاور، مردان، ملاکنڈ اور ہزارہ ڈویژن میں بھی کا امکان ہے۔ادھر ملک میں حالیہ بارشوں کے بعد دریاؤں میں پانی کی سطح بلند ہونے لگی ہے۔ دریائے راوی اور چناب میں نچلے درجے کا سیلاب ہے جبکہ دریائے سندھ اور کابل میں بھی پانی کا بہاؤ بڑھ رہا ہے۔نارووال میں جسٹر کے مقام پر پانی کا بہاؤ 11 ہزار سے بڑھ کر 51 ہزار کیوسک ہو گیا ہے۔ لاہور کے قریب شاہدرہ میں بھی پانی کی سطح میں اضافہ ہو رہا ہے جس سے قریبی آبادیاں متاثر ہونے کا خدشہ ہے۔سیالکوٹ کے قریب دریائے چناب میں ہیڈ مرالہ کے مقام پر نچلے درجے کا سیلاب ہے، جہاں پانی کی آمد 1لاکھ 24 ہزار 913 اور اخراج 102513 کیوسک ہے۔جموں توی میں پانی کی آمد 11465 کیوسک اور مناور توی میں پانچ ہزار ایک سو اکہتر کیوسک ریکارڈ کی گئی۔دریائے کابل میں نوشہرہ کے مقام پر بھی نچلے درجے کا سیلاب ہے جہاں سے 67 ہزار کیوسک کا ریلا گزر رہا ہے۔ دریائے سندھ میں بھی پانی کی سطح بلند ہے۔گڈو کے مقام پر پانی کا بہاؤ 3 لاکھ 68 ہزار کیوسک ریکارڈ کیا گیا۔ خان پور کی نہر میں بستی پہوڑاں کے قریب 20 فٹ چوڑا شگاف پڑ گیا جس سے فصلیں زیر آب آگئیں اور پانی قبرستان میں داخل ہو گیا۔
سیلاب