پوزیشن اتحاد کیلئے تمام جماعتوں کو انا ختم کرنا ہوگی، چودھری پرویزالٰہی

پوزیشن اتحاد کیلئے تمام جماعتوں کو انا ختم کرنا ہوگی، چودھری پرویزالٰہی

لاہور(نمائندہ خصوصی) پاکستان مسلم لیگ کے سینئرمرکزی رہنما و سابق نائب وزیراعظم چودھری پرویزالٰہی نے کہا ہے کہ اپوزیشن جماعتوں کو اتحاد کیلئے اپنا اندر اور باہر ایک کرنے کے علاوہ انا کو ختم کرنا ہو گا، قومی اور اجتماعی مفاد کو ذاتی اور جماعتی مفاد پر ترجیح دینا ہو گی۔ وہ یہاں اپنی رہائش گاہ پر پارٹی رہنماؤں اور کارکنوں سے گفتگو کر رہے تھے۔ انہوں نے کہا کہ ترقی اور خوشحالی نمائشی منصوبوں سے نہیں ہمارے دور کی طرح عوامی فلاح و بہبود اور فراہمی روزگار کے میگا پراجیکٹس سے آتی ہے۔ انہوں نے کہا کہ تمام اپوزیشن لیڈروں کو بلاشبہ ملک و قوم کو درپیش خطرات اور چیلنجز کا ادراک تو ہے لیکن ان خطرات و چیلنجز کو مزید بڑھنے سے روکنے پر قابو پانے کیلئے انہیں ایک پیج اور پلیٹ فارم پر آنا ہو گا اور تمام جماعتوں کو اپنا اپنا راگ الاپنے اور احتجاج کے اعلان کرنے کی بجائے باہم مل کر ایک ساتھ چلنا ہو گا، ملک کو عالمی سطح پر تنہا کرنے، جمہوریت کے نام پر بادشاہت اور ہر قومی ادارے پر اپنی اجارہ داری قائم کرنے اور ذاتی مفادات کیلئے ملکی مفادات قربان کرنے والوں کا راستہ روکنا ہو گا ورنہ محب وطن عوام اور مورخ انہیں معاف نہیں کرے گا۔ انہوں نے کہا کہ عوام باالخصوص غریبوں، مزدوروں اور کسانوں کی بہتری و خوشحالی کیلئے جمہوریت اور آئین و قانون کی بالادستی قائم کرنے کی خاطر تمام جماعتوں کو باہمی اختلافات ختم کرنا ہوں گے۔ چودھری پرویزالٰہی نے کہا کہ پاکستان کی تاریخ اٹھا کر دیکھ لیں من مانی کرنے والے حکمرانوں سے نجات کیلئے ہمیشہ اپوزیشن الائنس کا راستہ اپنایا گیا اور کامیابی ملی۔ انہوں نے کہا کہ ہم روز اول سے تمام اپوزیشن جماعتوں میں اتحاد پر زور دے رہے ہیں لیکن حکومت ان میں انتشار کا مکمل فائدہ اٹھا رہی ہے۔

مزید : صفحہ آخر

لائیو ٹی وی نشریات دیکھنے کے لیے ویب سائٹ پر ”لائیو ٹی وی “ کے آپشن یا یہاں کلک کریں۔


loading...