بلدیاتی قانون مسترد ، جماعت اسلامی نے سندھ اسمبلی کے باہر دھرنے کا اعلان کردیا
لاہور (ڈیلی پاکستان آن لائن )جماعت اسلامی کے تحت سندھ حکومت کے بلدیاتی قانون ،شہری اداروں پر قبضے کے خلاف اور کراچی کے ساڑھے تین کروڑ عوام کے مسائل کے حل اور جائز وقانون حق کے لیے اتوار کو ایم اے جناح روڈ پر مزار قائد تا تبت سینٹر ’کراچی بچاو مارچ‘ منعقدکیا جس میں مختلف شعبہ ہائے زندگی وطبقات اور اقلیتی برادری سے وابستہ افراد نے شرکت کی، جماعت اسلامی نے سندھ حکومت کے منظور کردہ بلدیاتی قانون کو مسترد کرتے ہوئے 31دسمبر کو سندھ اسمبلی پر دھرنے کا اعلان کیا ’کراچی بچاو مارچ‘ سے امیرجماعت اسلامی پاکستان سراج الحق،حافظ نعیم ارحمن ، ڈاکٹر اسامہ رضی اور عبد الرزاق خان نے بھی خطاب کیا۔
سراج الحق نے کہاکہ جماعت اسلامی پاکستان اہل کراچی کے ساتھ ہے اور حقوق کراچی تحریک میں ان کی پشت پر ہے ،جس طرح گوادر کے لوگوں نے عظیم جدوجہد کے ذریعے مولانا ہدایت الرحمن کی قیادت میں اپنا حق لیا اور بااختیار ذمہ داران گوادر پہنچے ان کوحقوق دینے کا اعلان کیا اسی طرح کراچی کے عوام کی اس جدوجہد اس تحریک سے کراچی کے عوام کو بھی ضرور ان کاحق ملےگااور کوئی ان کےحق پر ڈاکا نہیں ڈال سکے گا،جنہوں نے اس شہر کو لوٹا اور عوام کو بنیادی حقوق سے محروم کیا،ان کے لیے پیغام ہے کہ جماعت اسلامی کراچی کے عوام کی پشت پر ہے،اگر انہیں ان کا حق نہیں دیا گیا اور مطالبات پورے نہیں کیے گئے تو ہم کراچی سے چترال تک گلی گلی کوچے کوچے کراچی کا مقدمہ لڑیں گے۔
انہوں نے کہاکہ کراچی بچاو مارچ پر اہلیان کراچی، حافظ نعیم الرحمن، ان کی ٹیم اور کارکنان کو مبارکباد پیش کرتا ہوں،کراچی پورے ملک کی ماں ہے، اگر یہ شہر توانا اور مضبوط ہوگا تو پورا ملک مضبوط ہوگا ،بد قسمتی سے موجودہ اور ماضی کی حکومتوں اورپیپلزپارٹی ، ن لیگ اورتحریک انصاف سمیت تینوں حکمران پارٹیوں نے کراچی کا خون چوسا ہے اور اس جرم میں سب حکومتیں شریک رہیں،کراچی کے عوام ایک جائز اور قانونی اور آئینی جدوجہد کررہے ہیں ان کو تعلیم صحت روزگار ٹرانسپورٹ پانی بجلی اور گیس چائیے، ان کی حق تلفی نہیں ہونی چاہئے،کراچی کے حقوق اور مسائل کے حل کے لیے حافظ نعیم الرحمن کی قیادت میں ان کی ٹیم اور کارکنان عوام کے لیے جدوجہد کررہے ہیں، یہ عوامی جدوجہد ضرور کامیاب ہوگی۔
سراج الحق نے کہاکہ جماعت اسلامی صرف کراچی ہی نہیں پورے ملک کو خوشحال اور اسلامی ملک بنانے کی صلاحیت رکھتی ہے،عوام جماعت اسلامی کا ساتھ دیں حالات ضرور بدلیں گے،ملک کے اندر آمروں اور نام نہاد سیاسی حکومتیں اقتدار میں رہیں لیکن عوام کے حالات نہیں بدلے ،ملک کے اندر سارے تجربات ناکام ہوگئے ہیں،اب صرف اور صرف اسلامی نظام سے ہی حالات بہتر ہوں گے،کراچی ایک دن عالم اسلام کا قائد شہر ضرور بنے گا، جماعت اسلامی عوام کی خدمت اور مسائل کے حل کی جدوجہد جاری رکھے گی۔
انہوں نے کہاکہ افسوس کہ کراچی کےعوام سےجن پارٹیوں نےووٹ لیےان کےلیےکچھ نہیں کیا ،اپنے بنک بیلنس بنائے اور کاروبار بڑھائے،پیپلز پارٹی 14 سال سے حکومت کررہی ہے، یہ کراچی میں کیا اندرون سندھ کے لیے بھی کچھ نہیں کرسکی،تھر کے علاقوں میں ہزاروں بچے بھوک سے مررہے ہیں، اس پارٹی اور اس کی حکومت نے عوام کے ساتھ انصاف نہیں کیا، ان کی شوگر ملوں اور کاروبار میں تو اضافہ ہوا، کراچی اور اندرون سندھ کے عوام کو کچھ نہیں ملا ،کراچی کے لوگ سندھ کو 95 فیصد ٹیکس دیتے ہیں تو پھر اس شہر کو ان کا حق کیوں نہیں دیا جاتا؟۔
انہوں نے کہا کہ سندھ حکومت نے لاڑکانہ ،سکھر ،شکار پورسمیت اندرون سندھ کے شہروں کے لیے کچھ نہیں کیا اور کراچی کو بھی تباہ و برباد کررہی ہے ،سندھ حکومت اگر کراچی کے مئیر کو صرف جھاڑو دینے والے اختیارات دے گی تو پھر ایسے مئیر کا کیا فائدہ ؟سندھ حکومت لندن، استنبول، قاہرہ کے مئیر کے اختیارات اور کارکردگی اور ان شہروں کے حالات دیکھیں، جب کراچی کے شہر کے پاس اختیارات نہیں ہوں گے اور سارے اختیارات وزیر اعلی کے پاس ہوں گے تو مسائل کس طرح حل ہوں گے؟وزیر اعلی سندھ جواب دیں کہ جب وہ کہتے ہیں ہم اکثریت میں ہیں تو اس کے ذریعے وہ جمہوری رائے اور سوچ کو بلڈوز کیوں کرتے ہیں؟بلدیاتی اداروں کو مالی، انتظامی اور سیاسی اختیارات دینے پر کیوں تیار نہیں ہوتے،ہم کہتے ہیں کہ صرف جماعت اسلامی کی قیادت ہی کراچی کے عوام کو مسائل سے نکال سکتی ہے،عبد الستار افغانی اور نعمت اللہ خان نے جس طرح مثالی اور تاریخی خدمات انجام دی تھیں،اس کی مثال نہیں ملتی ۔
