ڈی چوک پر قتل پاکستانیوں کا خون بہا ادا کیا جائے، شیر افضل مروت

پشاور (این این آئی)پی ٹی آئی کے رہنما شیر افضل مروت نے کہا ہے کہ ڈی چوک پر جن پاکستانیوں کا قتل عام کیا گیا ان کا خون بہا ادا کیا جائے۔پشاور ہائی کورٹ کے باہر میڈیا سے گفتگو کرتے ہوئے شیر افضل مروت نے کہا کہ سول نافرمانی تب شروع ہوگی جب کوئی دوسرا راستہ نہیں ہوگا، پاکستان تحریک انصاف کو ملک کی ضروریات کا احساس ہے، معاشی استحکام سے بڑھ کر پاکستان کو آزاد عدلیہ کی ضرورت ہے، ریاستی اداروں کو اپنی حدود میں رکھنے کی ضرورت ہے۔انہوں نے کہا کہ مسائل سنگین صورتحال اختیار کرجائیں تو مذاکرات ناگزیر ہیں، 50، 50 قتل کے بعد بھی ہم جرگے کرتے ہیں یہ رواج ہے، جن پاکستانیوں کو مارا گیا ہے ان کا خون بہا ادا کیا جائے، یہ ذمہ داری قبول کرنی چاہیے، سوگوار خاندانوں سے تعزیت کریں۔ شیر افضل مروت نے کہا کہ سیاسی عدم استحکام ہے، ہزاروں ورکرز جیلوں میں بند ہیں، ان مسائل کا حل ایک پارلیمانی کمیٹی کے ذریعے نکل اتا ہے تو ملک کے لئے سود مند ہے۔ انہوں نے کہا کہ پی ٹی آئی مذاکراتی کمیٹی مکمل بااختیار ہے، عدلیہ کی آزادی، 9مئی واقعات مینڈیٹ چوری سب مذاکرات میں زیر بحث آئیں گے، امید ہے سیاسی قیادت ایک دیرپا فارمولا پر رضامند ہوگی۔

شیر افضل مروت