سکیورٹی فورسز کے خیبر پختونخوا میں 3آپریشنز، 11خوارج ہلا ک
راولپنڈی (مانیٹرنگ ڈیسک) سکیورٹی فورسز نے خیبرپختونخوا کے تین مختلف اضلاع میں 18،17 دسمبر کی رات کارروائیاں کرتے ہوئے 11خوارج کو جہنم واصل کر دیا۔پاک فو ج کے شعبہ تعلقات عامہ (آئی ایس پی آر) کے مطابق خیبرپختونخوا کے ضلع ٹانک میں دہشت گردوں کی موجودگی کی اطلاع پر آپریشن کیا گیا، موثر کارروائی کے نتیجے میں 7خارجی دہشتگرد مارے گئے، انٹیلی جنس کی بنیاد پر ایک اور کارروائی شمالی وزیرستان کے علاقے دتہ خیل میں کی گئی، جہاں سکیورٹی فورسز کیساتھ شدید فائرنگ کے تبادلے میں 2 خارجی دہشتگر د ہلاک ہو گئے،اسی طرح فورسز کی تیسری کارروائی ضلع مہمند کے علاقے مامد گٹ میں کی گئی، جہاں شدید جھڑپ کے بعد 2 خارجی دہشتگرد مارے گئے۔ترجمان پاک فوج نے بتایا مارے گئے دہشتگردوں کے قبضے سے اسلحہ اور گولہ بارود بھی برآمد ہوا، جو سکیورٹی فورسز کیساتھ ساتھ معصوم شہریوں کیخلاف دہشتگردی کی کارروائیوں میں سرگرم تھے۔آئی ایس پی آر کے مطابق علاقے میں موجود کسی ممکنہ خارجی دہشت گرد کو ختم کرنے کیلئے کلیئرنس آپریشن جاری ہے، پاکستان کی سکیورٹی فورسز ملک سے دہشتگردی کی لعنت کو ختم کرنے کیلئے پرعزم ہیں۔واضح رہے 13 دسمبر کو بھی سکیورٹی فورسز کی جانب سے خیبرپختونخوا اور بلوچستان کے مختلف اضلاع میں گزشتہ 5 روز کے دوران کیے گئے آپریشن کے دوران 43 خارجی دہشتگرد مارے گئے تھے۔
خوارج ہلاک
