مرغی، دالوں کی قیمتیں مڈل مین کے کردار کے باعث کم نہیں ہو رہیں: وزیر خزانہ 

                                                            اسلام آباد(مانیٹرنگ ڈیسک، نیوز ایجنسیاں)  وفاقی وزیر خزانہ محمد اورنگزیب نے کہا ہے کہ مرغی،دالوں کی قیمتیں مڈل مین کے کردارکے باعث کم نہیں ہو رہیں۔شہر اقتدار میں وزیرخزانہ محمد اورنگزیب کا کابینہ کی اقتصادی رابطہ کمیٹی کے اجلاس سے خطاب کرتے ہوئے کہنا تھا کہ معاشی میدان میں اہم کامیابیوں کا سلسلہ جاری ہے،کرنٹ اکاؤنٹ دس سال بعد سرپلس ہونا اہم پیشرفت ہے، ترسیلات زرمیں 35فیصد اضافہ ہوا ہے۔انہوں نے کہا کہ یقین ہے کہ ترسیلات زر35ارب ڈالرسے بڑھ جائیں گی،برآمدی شعبے میں بھی مثبت رجحان ہے، مہنگائی ساڑھے6سال کی کم ترین سطح پرآگئی ہے، سٹیٹ بینک نے مسلسل پانچویں بارپالیسی ریٹ میں کمی کی ہے۔وزیر خزانہ کا کہنا تھا کہ پالیسی ریٹ کا 13فیصد پرآنا معیشت کیلیے اہمیت کا حامل ہے، کاروباری برادری کے اعتماد میں نمایاں اضافہ ہوا ہے، معاشی استحکام کے ساتھ شرح نمو میں اضافہ ترجیح ہے، سیمنٹ کی فروخت میں 5فیصد اضافہ ہوا ہے۔محمداورنگزیب نے مزید کہا کہ ای سی سی میں ایک ماہ قبل مہنگائی کا احاطہ کیا تھا، آج کے ای سی سی میں پہلا ایجنڈا قیمتیں کم کرنے پر ہو گا، پرامید ہوں معاشی بہتری کا سفرجاری رہیگا۔وفاقی وزیر خزانہ کا مزید کہنا تھا کہ سوال اٹھایا جاتا ہے کہ عام آدمی پرمعاشی بہتری کا اثر کیوں نہیں پڑ رہا، مرغی، دالوں کی قیمتیں مڈل مین کے کردارکے باعث کم نہیں ہو رہیں، مرغی، دالوں کی قیمتیں دنیا بھر میں کم ہوئیں ہم بھی مانیٹرکریں گے۔

وزیر خزانہ