اسحا ق ڈار سے مصر، ایرانی وزراء خارجہ کی ملاقاتیں، غزہ کی صورتحال پر تبادلہ خیال 

                                                قاہرہ(مانیٹر نگ ڈیسک) نائب وزیر اعظم و وزیر خارجہ اسحاق ڈار سے ایرانی اور مصر ی وزرائے خارجہ کی ملاقاتیں۔ایر انی وزیر خارجہ سید عباس عراقچی سے ملاقات ڈی ایٹ وزرائے خارجہ کونسل اجلاس کے موقع پر ہوئی، وزرائے خارجہ نے مشرق وسطیٰ کی صورتحال پر تبادلہ خیال کیا۔ترجمان کے مطابق دونوں وزرائے خارجہ نے دوطرفہ تعلقات پر اطمینان کا اظہار کیا، رہنماؤں نے تجارتی اور اقتصادی تعاون بڑھانے پر اتفاق کیا۔وزرائے خارجہ نے عوام سے عوام کے روابط بڑھانے پر اتفاق کیا، وزرائے خارجہ نے فلسطین پر پاکستان کے اصولی موقف کی توثیق کی۔ترجمان کے مطابق ملاقات کے دوران دونوں وزرائے خارجہ نے فلسطینی عوام کے ساتھ یکجہتی کا اظہار کیا۔علاوہ ازیں نائب وزیر اعظم و وزیر خارجہ سینیٹر محمد اسحاق ڈار نے قاہرہ میں ڈی ایٹ وزارتی اجلاس کے موقع پر مصر کے وزیر برائے امور خارجہ بدر عبدالعاطی سے ملاقات کی۔ترجمان دفتر خارجہ کے مطابق نائب وزیر اعظم، وزیر خارجہ اسحاق ڈار نے ڈی ایٹ سربراہ اجلاس اور وزارتی اجلاس کی میزبانی پر مصری حکومت کو مبارکباد دی اور پرتپاک مہمان نوازی پر وزیر خارجہ بدر عبدالعاطی کا شکریہ ادا کیا۔دونوں وزرائے خارجہ نے دونوں ممالک کے درمیان کثیر الجہتی تعلقات کو سراہتے ہوئے سیاسی، دفاعی، ثقافتی، اقتصادی اور تجارتی تعلقات اور عوامی سطح پر رابطوں کو مزید مستحکم کرنے پر اتفاق کیا۔دونوں وزرائے خارجہ نے اسرائیل کی جانب سے غزہ میں جاری نسل کشی اور مغربی کنارے میں مظالم سمیت علاقائی صورتحال پر تبادلہ خیال کیا، غزہ میں جاری اسرائیلی نسل کشی پر شدید تنقید کی، انہوں نے غزہ میں فوری جنگ بندی کا مطالبہ کیا تاکہ بے گناہ فلسطینیوں کی جانوں کے مزید ضیاع کو روکا جا سکے۔نائب وزیر اعظم اور وزیر خارجہ اسحاق ڈار نے غزہ کے عوام کو انسانی امداد فراہم کرنے اور مقبوضہ فلسطین میں جنگ بندی کے لئے سفارتی کوششوں پر مصر کے کردار کو سراہا، دونوں وزرائے خارجہ نے جون 1967 سے قبل کی سرحدوں کی بنیاد پر ایک قابل عمل، متصل اور آزاد فلسطینی ریاست جس کا دارالحکومت القدس الشریف ہو کے قیام کی دوٹوک حمایت کا بھی اظہار کیا۔

اسحاق ڈار