سابق صدر عارف علوی کی گرفتاری کے خلاف حکم امتناع میں توسیع

کراچی(ڈیلی پاکستان آن لائن)سندھ ہائیکورٹ نے سابق صدر عارف علوی کی گرفتاری کے خلاف حکم امتناع میں توسیع کردی اورصوبے میں درج مقدمات کی تفصیلات فراہم کرنے کیلئے مہلت دیدی۔

نجی ٹی وی چینل دنیا نیوز کے مطابق  سندھ ہائیکورٹ میں سابق صدر عارف علوی کیخلاف مقدمات تفصیلات طلب کرنے کی درخواست پر سماعت ہوئی،اسسٹنٹ اٹارنی جنرل نے رپورٹ عدالت میں جمع کرا دی،رپورٹ کے مطابق ایف آئی اے میں عارف علوی کیخلاف کوئی مقدمہ درج نہیں،اسسٹنٹ ایڈووکیٹ جنرل نے درج مقدمات کی تفصیلات کیلئے مہلت مانگ لی،عدالت نے استفسار کیا کہ مقدمات کی تفصیلات حاصل کرنے میں اتنا سوقت کیوں لگ رہا ہے؟

سرکاری وکیل نے کہاکہ مختلف محکموں سے تفصیلات جمع کرنی ہیں،عدالت نے کہاکہ آئی جی سندھ مقدمات کی تفصیلات کیلئے ذمہ دار نہیں تو کون ہے،جسٹس عدنان الکریم میمن نے کہاکہ کیا ایف آئی آر چھپائی جارہی ہیں؟سرکاری وکیل نے کہاکہ ایف آئی آر میانوالی میں درج اور حفاظتی ضمانت یہاں سے حاصل کی،عدالت نے کہاکہ درخواست گزار کو خدشات ہیں کہ یہاں بھی مقدمات درج ہو سکتے ہیں، جسٹس کے کے آغا نے کہاکہ ہم نے اسی لئے ریکارڈ منگوایا ہے، عدالت نے عارف علوی کی گرفتاری کے خلاف حکم امتناع میں توسیع کردی اور صوبے میں درج مقدمات کی تفصیلات فراہم کرنے کیلئے مہلت دیدی،عدالت نے کیس کی مزید سماعت 13جنوری تک ملتوی کردی۔

یاد رہے کہ عدالت نے عارف علوی کو کسی نئے مقدمے میں گرفتار کرنے سے روک رکھا ہے۔