پی ایس ایل میں کراچی کنگز کی مسلسل ناکامیوں پر رمیز راجہ نے نام لیے بغیر وسیم اکرم کو ذمہ دار ٹھہرا دیا
کراچی(ڈیلی پاکستان آن لائن) سابق چیئرمین پاکستان کرکٹ بورڈ اور کمنٹیٹر رمیز راجہ نے کراچی کنگز کی پی ایس ایل 8 میں مسلسل ناکامیوں کا ذمہ دار ٹیم انتظامیہ اور سرپرستوں کو ٹھہرا دیا ہے۔
تفصیلات کے مطابق پی ایس ایل PSL8 میں بھی کراچی کنگز ابھی تک کوئی خاطر خواہ پرفارمنس نہیں دکھا پا ئی۔ گزشتہ ایڈیشن میں بھی کراچی کنگز کی ٹیم محض ایک میچ جیت سکی تھی جبکہ رواں سیزن میں اپنے پہلے تینوں میچوں میں شکست کا منہ دیکھ چکی ہے۔
ان کا کہنا تھا کہ کراچی کنگز کو اپنی قسمت بدلنے کے لیے انتظامیہ اور سرپرستوں کو تبدیل کرنے کی ضرورت ہے تاکہ وہ ٹاپ تھری میں اس سیزن کا اختتام کرسکیں۔انہوں نے کہا کہ فرنچائز کی جانب سے کم تبدیلیاں اور اعتدال پسندی فرنچائز کو نقصان پہنچا رہی ہے اور اگر کنگز نے ہارنے کا سلسلہ جاری رکھا تو شائقین بھی اپنا صبر کھودیں گے کیونکہ ہوم گراؤنڈ پر ٹیم کے ہارنے سے شائقین ناراض ہو جاتے ہیں۔خیال رہے کہ کراچی کنگز کے ساتھ وسیم اکرم پی ایس ایل 4 سے صدر اور باؤلنگ مینٹور کے طور پرمنسلک ہیں لیکن فرنچائز گزشتہ دو سیزن سے کوئی خاص پرفارمنس دیکھانے میں ناکام رہی ہے۔
واضح رہے کہ گزشتہ ماہ وسیم اکرم نے کرکٹ پاکستان کو دیئے گئے ایک خصوصی انٹرویو میں سابق چیئرمین پی سی بی رمیز راجا کو شدید تنقید کا نشانہ بنایا تھا۔ انکا کہنا تھا کہ وہ چھ دن کیلئے آئے تھے اور چلے گئے۔ اب انہیں واپس اپنی جگہ پر آجانا چاہیے۔ نجم سیٹھی ایک تجربہ کار شخص ہیں وہ معاملات ڈیل کرنا جانتے ہیں۔
