مصطفی قتل کیس: ملزم ارمغان کے میڈیکل کی رپورٹ سامنے آگئی

کراچی(ڈیلی پاکستان آن لائن )نوجوان مصطفیٰ عامر کے اغوا اور قتل کیس کے مرکزی ملزم ارمغان کی میڈیکل رپورٹ سامنے آگئی۔
نجی ٹی وی جیو نیوز نے ملزم ارمغان کے 10 فروری کو ہونے والے میڈیکل کی رپورٹ حاصل کر لی ہے۔رپورٹ کے مطابق ملزم ارمغان کو 3 بج کر 55 منٹ پر میڈیکو لیگل کے لئے پیش کیا گیا، تفتیشی افسر انسپکٹر امیر علی ملزم ارمغان کو ہتھکڑی کے ہمراہ جناح ہسپتال لائے۔رپورٹ میں ہے کہ ملزم ارمغان کی حالت بہتر اور بات چیت کر رہا تھا، ملزم کا بلڈ پریشر نارمل اور وہ مکمل ہوش و حواس میں تھا۔
میڈیکل رپورٹ کے مطابق ملزم کے کولہوں پر سرخ نشانات موجود تھے، ملزم کے کانوں کے پیچھے اور کہنیوں پر بھی کسی سخت چیز کی چوٹ کے سرخ نشانات موجود تھے۔
یاد رہے کہ مصطفیٰ عامر کے اغوا اور قتل کے مرکزی ارمغان غازی کو 8 فروری کو کراچی کے علاقے ڈیفنس خیابان مومن سے پولیس مقابلے کے بعد حراست میں لیا گیا تھا۔
کیس کے شریک ملزم شیراز نے دوران تفتیش انکشاف کیا تھا کہ ارمغان نے مصطفیٰ کو پہلے بنگلے پر مارا اور پھر ہم اسے اس کی ہی گاڑی کی ڈگی میں ڈال کر حب لے گئے جہاں ارمغان نے پٹرول چھڑک کر گاڑی کو آگ لگا دی۔
گزشتہ روز عدالت نے مصطفیٰ قتل کیس کے مرکزی ملزم ارمغان غازی کو 4 روزہ جسمانی ریمانڈ پر پولیس کے حوالے کیا تھا۔