پنجاب یونیورسٹی کالج آف فارمیسی اور سندس فاؤنڈیشن کے مابین ایم او یو پر دستخط ، طلباء و طالبات کی بڑی تعداد کی شرکت
لاہور (ویب ڈیسک) پنجاب یونیورسٹی کالج آف فارمیسی اور سندس فاؤنڈیشن کے مابین ایک مفاہمت کی یادداشت (ایم او یو) پر دستخط کیے گئے۔ اس سلسلے میں ایک پروقار تقریب پنجاب یونیورسٹی کالج آف فارمیسی میں منعقد ہوئی جس میں وائس چانسلر پنجاب یونیورسٹی ڈاکٹر محمد علی، پرنسپل کالج آف فارمیسی پروفیسر ڈاکٹر سید عاطف رضا، صدر سندس فاؤنڈیشن یاسین خان، ڈائریکٹر سندس فاؤنڈیشن خالد اقبال ڈار اور دیگر معززین نے شرکت کی۔
تقریب میں پنجاب یونیورسٹی کے طلباء و طالبات کی بڑی تعداد نے شرکت کی جو اس معاہدے کے تحت تھیلیسیمیا کے مریض بچوں کی مدد اور فاؤنڈیشن کے مختلف فلاحی کاموں میں اپنا کردار ادا کریں گے۔ ایم او یو پر پرنسپل کالج آف فارمیسی پروفیسر ڈاکٹر سید عاطف رضا اور صدر سندس فاؤنڈیشن یاسین خان نے دستخط کیے۔
تقریب سے خطاب کرتے ہوئے ڈائریکٹر سندس فاؤنڈیشن خالد اقبال ڈار نے کہا کہ پنجاب یونیورسٹی کے طلباء نے ایک بہترین انشیٹو لیا ہے جو قابلِ تحسین ہے۔ انہوں نے بتایا کہ سندس فاؤنڈیشن کے پاس اس وقت سات ہزار سے زائد تھیلیسیمیا کے مریض بچے رجسٹرڈ ہیں، جنہیں مستقل بنیادوں پر خون کی ضرورت ہوتی ہے۔ انہوں نے کہا کہ تھیلیسیمیا کے بچوں کے لیے خون زندگی کی حیثیت رکھتا ہے اور طلباء کی شرکت سے اس مشن کو مزید تقویت ملے گی۔
اس موقع پر وائس چانسلر پنجاب یونیورسٹی ڈاکٹر محمد علی نے کہا کہ سندس فاؤنڈیشن کا کام بہت اہمیت کا حامل ہے اور ہم اس مشن میں ان کے شانہ بشانہ کھڑے ہیں۔ انہوں نے مزید کہا کہ کالج آف فارمیسی کے طلباء و طالبات نے بے حد مثبت قدم اٹھایا ہے اور میں ان کے جذبے کو سراہتا ہوں۔ وائس چانسلر نے فاؤنڈیشن کے ساتھ تعاون کرنے والے طلباء و طالبات اور کالج آف فارمیسی کے اساتذہ کو بھی خراجِ تحسین پیش کیا۔
تقریب میں موجود شرکاء نے اس شاندار شراکت داری کو ایک مثبت قدم قرار دیا اور امید ظاہر کی کہ اس تعاون کے ذریعے تھیلیسیمیا کے مریضوں کو زیادہ بہتر سہولیات میسر آئیں گی۔
