گورنر ہاؤس کے بیرونی گیٹ پر عوام الناس کے لیے صبح شام مفت کھانے کا انتظام کردیا گیا
لاہور(ڈیلی پاکستان آن لائن)گورنر پنجاب سردار سلیم حیدر خان کی زیر نگرانی گورنر ہاؤس کے بیرونی گیٹ پر عوام الناس کے لیے مفت کھانے کا انتظام کردیا گیا۔عوام الناس کے لیے صبح و شام مفت اور بہترین کھانے کی سہولت میسر ہوگی۔گورنر پنجاب نے صوبائی وزیر تعلیم رانا سکندر حیات اور سیلانی ٹریسٹ کے چیئر مین مولانا بشیر فاروق کے ہمراہ افتتاح کر دیا۔ گورنر سردار سلیم حیدر خان کا کہنا تھا کہ ہر خاص و عام کو گورنر ہاؤس کے بیرونی گیٹ پر روزانہ صبح و شام مفت کھانے کی دعوت ہے، موجودہ مہنگائی کے دور میں مزدور اور دیہاڑی دار طبقہ مفت کھانے کی سہولت سے فائدہ اٹھا سکے گا۔
انہوں نے کہا کہ حکومت سارے فلاحی کام خود نہیں کرسکتی، مخیر حضرات کو آگے آکر ملک کی بہتری کے لیے کردار ادا کرنا ہوگا۔ جو کھانا میں خود اپنے لیے پسند کرتا ہوں وہی کھانا لنگر خانے میں کھلایا جائے گا، پیپلز پارٹی اور (ن )لیگ ملک کی خاطر ایک پیج پر ہیں۔
ان کا کہنا تھا کہ ملک بہتری کی طرف گامز ن ہے ، ہمیں ملک کو خراب نہیں بلکہ بہتری کی طرف لے کر جانا ہے، اسلام میں بھوکے کو کھانے کھلانے کی بڑی فضیلت ہے، پیپلز پارٹی اور( ن) لیگ مختلف نظریاتی جماعتیں ہیں مگر ملک اس چیز کا متحمل نہیں کہ آپس میں لڑا جائے۔
اس دوران گورنر پنجاب کے ہمراہ صوبائی وزیر تعلیم رانا سکندر حیات نے بھی لوگوں کے ساتھ بیٹھ کر کھانا کھایا۔ صوبائی وزیرتعلیم رانا سکندر حیات کا کہنا تھا کہ گورنر پنجاب سردار سلیم حیدر خان نے خالی وعدے نہیں بلکہ حقیقی طور پر گورنر ہاؤس کو عوام کے لیے کھول دیئے، گورنر پنجاب ایک عوامی اور تعلیم دوست شخصیت ہیں۔
