شریف برادران دولت لوٹنے، کرسی بچانے کیلئے کسی بھی سطح تک گر سکتے ہیں: ڈاکٹر طاہر القادری

شریف برادران دولت لوٹنے، کرسی بچانے کیلئے کسی بھی سطح تک گر سکتے ہیں: ڈاکٹر ...

  

لاہور(ایجوکیشن رپورٹر)پاکستان عوامی تحریک کے سربراہ ڈاکٹر محمد طاہرالقادری نے کہا ہے کہ عوامی تحریک کی پہچان ہی عوامی طاقت ہے، ہمارے دشمن بھی ہماری اس طاقت سے اچھی طرح واقف ہیں، ماڈل ٹاؤن کے قتل عام میں ملوث شریف برادران کو کٹہرے میں لانے کیلئے ملک بھر سے کثیر تعداد میں سیاسی قیادت کو ایک سٹیج پر جمع کرنے کا ہدف 100فیصد حاصل ہوا۔ حصول انصاف کیلئے شروع کیے گئے احتجاج کی گاڑی کو ابھی پہلا گیئر لگایا، کب کتنی طاقت دکھانی اور گاڑی دوڑانی ہے اس کا فیصلہ اپنی حکمت عملی کے مطابق کریں گے، کرسیوں کی گنتی ہمارا نہیں مخالفین کا مسئلہ ہے۔جب جتنی عوامی طاقت درکار ہو گی جمع کر لیں گے۔ سنٹرل کور کمیٹی کے اجلاس سے خطاب کر تے ہوئے ڈاکٹر طاہرالقادری نے حصول انصاف کیلئے 17 جنوری کے احتجاج میں شریک ہونے والی جماعتوں کی قیادت اور کارکنوں کا شکریہ ادا کیا اور کہا کہ حصول انصاف کی احتجاجی تحریک کے حوصلہ افزاآغاز پر مطمئن ہوں، آئندہ کے لائحہ عمل کیلئے جلد سٹیرنگ کمیٹی کااجلاس بلائیں گے۔ مال روڈ احتجاج میں انسانی حرمت کے تحفظ اورقاتل اشرافیہ کے خلاف تمام جماعتوں کے کارکن جھنڈے سے جھنڈا اور کندھے سے کندھا ملا کر کھڑے ہوئے، الحمد للہ اول تا آخر پیار، محبت اور قومی یکجہتی کا شاندار سماں رہا، ورنہ تنہا پارٹی کے جلسے میں کرسیاں چلنے کی مثالیں عام ہیں۔ متحدہ اپوزیشن کے مال روڈ کے احتجاجی جلسہ میں نہ کسی کے بینر کا مسئلہ تھا نہ کسی کے خطاب کا، نہ کسی کیلئے کرسی مسئلہ تھی نہ کسی نعرے کا کوئی مسئلہ تھا، مال روڈ کا احتجاجی جلسہ قومی پرچم کے سائے تلے ہم ایک ہیں کا شاندار عملی مظاہرہ تھا۔ سب جماعتیں اپنے پارٹی منشور اور پالیسی کے مطابق سیاست کرنے اور مختلف ایشوز پر پارٹی موقف دینے کا حق رکھتی ہیں مگر بے گناہ انسانی خون بہانے کے غیر انسانی عمل کے خلاف قومی قیادت کا یکجا ہونا بڑی پیشرفت ہے۔ یہ یکجہتی قائم رہی تو مٹھی بھر قاتل انجام سے کسی صورت بچ نہیں پائیں گے۔ ن لیگ انتہا پسند جماعت ہے، ن لیگ کے لیڈروں کے کالعدم جماعتوں سے روابط کسی سے ڈھکے چھپے نہیں ، شریف برادران دولت لوٹنے،بچانے، کرسی حاصل کرنے اور اسے بچانے کیلئے بے گناہوں کا خون بہانے سمیت کسی بھی سطح پر گر سکتے ہیں، سانحہ ماڈل میں 100 لوگوں کو گولیاں مارنا 14 کو شہید کرنا، قصور میں ڈائریکٹ فائرنگ کر کے شہریوں کو قتل کرنا اور سیاسی کارکنوں کے خلاف دہشتگردی کی دفعات کے تحت جھوٹے مقدمات درج کرنا اس کے ناقابل تردید شواہد ہیں۔ ہم انتہا پسند ن لیگ کے نام نہاد ٹھیکیداروں کو ان کے انجام تک پہنچائیں گے اور وقت آنے پر آخری گیئر بھی لگا دیں گے۔

مزید :

صفحہ آخر -