سنگین دھمکیاں،  پی ٹی آئی سپورٹر گلفام حسین کیانی  کو لندن میں گرفتار  کرلیا گیا

لندن(آئی این پی)پاکستان تحریک انصاف کے سپورٹر گلفام حسین کیانی کو لندن میں سکاٹ لینڈ یارڈ پولیس نے گرفتار کرلیا۔ سکاٹ لینڈ یارڈ ذرائع نے گلفام حسین کی گرفتاری کی تصدیق بھی کردی۔

خیال رہے کہ سکاٹ لینڈ یارڈ نے 4 دن قبل گلفام حسین کے وارنٹ جاری کئے  تھے۔ گلفام کو وزیراعظم شہباز شریف  اور نواز شریف کو قتل کی دھمکیوں کے الزام میں گرفتار کیا گیا۔

گلفام نے ٹک ٹاک پر شریف برادران کو قتل، ایون فیلڈ اپارٹمنٹس تباہ کرنے کی دھمکی دی تھی۔ گلفام حسین نے ایون فیلڈ کے دروازوں پر پتھر پھینکنے کی ویڈیوز سوشل میڈیا پر اپلوڈ کی تھیں۔  مسلم لیگ ن  برطانیہ کے رہنما خرم بٹ نے گفام حسین کی ویڈیوز برطانوی پولیس کو دی تھیں۔ پولیس نے گلفام کیانی کو اس وقت گرفتار کیا جب وہ ایون فلیڈ گیٹ پر لاتیں مار رہے تھے۔

خرم بٹ نے کہا  کہ پولیس نے تصدیق کی کہ میری شکایت پر یہ گرفتاری عمل میں آئی ہے۔ میری شکایت پر پولیس اس معاملہ کو کئی ماہ سے دیکھ رہی تھی۔گلفام حسین کے قریبی ذرائع کا کہنا ہے کہ گلفام حسین کا فون اس وقت بند ہے ان سے رابطہ نہیں ہو رہا۔ گلفام حسین نے کبھی قانون ہاتھ میں نہیں لیا۔