مکیش امبانی کو 3 دن میں 2 ارب ڈالر کا نقصان اٹھانا پڑ گیا، کتنے اثاثے باقی رہ گئے؟

مکیش امبانی کو 3 دن میں 2 ارب ڈالر کا نقصان اٹھانا پڑ گیا، کتنے اثاثے باقی رہ ...
مکیش امبانی کو 3 دن میں 2 ارب ڈالر کا نقصان اٹھانا پڑ گیا، کتنے اثاثے باقی رہ گئے؟

  



نئی دلی (ڈیلی پاکستان آن لائن) اربوں ڈالر رکھنے والے ارب پتی افراد کے اثاثوں کی مالیت میں ہر روز سینکڑوں ملین یا ایک آدھ ارب ڈالر کا اتار چڑھاﺅ آتا رہتا ہے جس کے باعث ان کی فوربز رینکنگ بھی متاثر ہوتی ہے لیکن ایمازون کے بانی جیف بیزوس جیسے لوگوں کو صرف منافع ہی ہوتا ہے ، یہی وجہ ہے کہ گزشتہ ساڑھے 4 ماہ کے دوران ان کے اثاثے 131 ارب ڈالر سے بڑھ کر 162 ارب 60 کروڑ ڈالر ہوگئے ہیں۔

دوسری طرف بھارت کے امیر ترین شخص مکیش امبانی کو گزشتہ تین دن کے دوران اتنا نقصان ہوا ہے کہ جہاں وہ ساڑھے 4 ماہ پہلے کھڑے تھے وہیں اب واپس آگئے ہیں۔

فوربز کے مطابق جمعرات کو بھارت کے امیر ترین آدمی مکیش امبانی کو ایک ہی روز میں 487 ملین ڈالر کے نقصان کا سامنا کرنا پڑا جس کے باعث ان کے تین روز میں ہونے والے مجموعی نقصان کی مالیت 2 ارب ڈالر ہوگئی ہے۔

تین روز پہلے منگل 16 جولائی کو مکیش امبانی نے صرف ایک دن میں 659 ملین ڈالر کا منافع کمایا اور ان کے اثاثوں کی مالیت 52 ارب ڈالر 70 کروڑ ڈالر ہوگئی تھی لیکن تین روز میں انہیں ہونے والے نقصان کے باعث ان کے اثاثے 50 ارب 70 کروڑ ڈالرپر آگئے ہیں۔

تین روز پہلے وہ ارب پتی افراد کی فہرست میں 12 ویں نمبر پر تھے لیکن آج وہ 17ویں نمبر پر چلے گئے ہیں۔ رواں برس مارچ میں جب فوربز کی جانب سے دنیا کے ارب پتی افراد کی لسٹ جاری کی گئی تھی تو اس وقت مکیش امبانی 50 ارب ڈالرز کے اثاثوں کے ساتھ دنیا کے 13 ویں امیر ترین آدمی تھے۔

فوربز کی جانب سے 5 مارچ کو ارب پتی افراد کی فہرست جاری کی گئی تھی اور 19 جولائی کو اس فہرست کو آئے ہوئے 4 ماہ اور 14 دن گزر چکے ہیں۔ ان 134 دنوں کے دوران جیف بیزوس نے اپنے اثاثوں میں 31 ارب 60 کروڑڈالر، بل گیٹس نے تقریباً 6 ارب 90 کروڑ ڈالر اور فرانسیسی ارب پتی برنارڈ آرنالٹ نے تقریباً 21 ارب ڈالر کا اضافہ کیا ہے۔اس عرصے کے دوران بل گیٹس کے قریبی دوست وارن بفٹ تیسرے سے چوتھے نمبر پر پہنچ گئے اور ان کے اثاثے ساڑھے 82 ارب ڈالر سے کم ہو کر 81 ارب 70 کروڑ ڈالر پر آچکے ہیں۔

مزید : ڈیلی بائیٹس /بزنس /Breaking News