چینی فوج کے ہاتھوں بھارتی فوجیوں کی ہلاکت، امریکا کاردعمل بھی آگیا

چینی فوج کے ہاتھوں بھارتی فوجیوں کی ہلاکت، امریکا کاردعمل بھی آگیا
چینی فوج کے ہاتھوں بھارتی فوجیوں کی ہلاکت، امریکا کاردعمل بھی آگیا

  

واشنگٹن(ڈیلی پاکستان آن لائن) ہمالیہ ریجن لداخ کی وادی گلوان میں چینی اور بھارتی فوج میں تصادم اور اس دوران بیس انڈین فوجیوں کی ہلاکت پر امریکہ نے بھی ردعمل کااظہارکیاہے۔

امریکہ کی جانب سے جانی نقصان پر بھارت سے اظہارہمدردی کیاگیاہے۔

سماجی رابطے کی ویب سائٹ ٹویٹر پر امریکی وزیرخارجہ مائیک پومپیو کی جانب سے کہا گیا ہے کہ "ہم بھارت کے عوام سے چین کے ساتھ حالیہ کشیدگی میں ہونے والے جانی نقصان پر تعزیت کرتے ہیں، ہلاک ہونے والے بھارتی فوجیوں کے اہلِ خانہ، ان کے رشتہ داروں اور خاندانوں کو اپنے غم میں یاد رکھیں گے"۔

امریکی وزیر خارجہ نے ایک ایسے وقت میں ٹویٹ کیا ہے جب گزشتہ روز بھارت نے اپنے ہلاک ہونے والے فوجیوں کی آخری رسومات اداکی ہیں۔ 

یاد رہے کہ پیر کی شب بھارت اور چین کی فوجوں کے درمیان مشرقی لداخ کی گلوان ویلی میں جھڑپ ہوئی تھی جس میں بھارتی فوج کے ایک کرنل سمیت 20 اہلکار ہلاک ہو گئے تھے۔

دونوں ملکوں کے درمیان 1962 کی جنگ کے بعد اس طرح کی جھڑپ ہوئی ہے جس میں جانی نقصان ہوا ہے جب کہ دونوں ہی ملک اس جھڑپ کا ذمہ دار ایک دوسرے کو قرار دے رہے ہیں۔

تازہ ترین صورتحال یہ ہے کہ بھارت اور چین کی فوج کے درمیان حالیہ محاذ آرائی کے بعد دونوں ملکوں نے سفارتی اور عسکری سطح پر کشیدگی کے خاتمے کی کوششیں تیز کر دی ہیں۔

بھارتی خبر رساں ادارے پریس ٹرسٹ آف انڈیا (پی ٹی آئی) اور دیگر مقامی میڈیا نے رپورٹ کیا ہے کہ چین نے جمعرات کی شب زیرِ حراست 10 فوجیوں کو چھوڑ دیا ہے۔بھارتی اخبار 'دی ہندو' نے خبر دی ہے کہ بھارتی فوج اور چین کی پیپلز لیبریشن آرمی کے میجر لیول کی سطح کے افسران کے درمیان ایک معاہدہ ہوا ہے جس کے تحت زیرِ حراست بھارتی فوجیوں کو رہا کیا گیا ہے۔

بھارت کی حکومت کی جانب سے فوجیوں کی رہائی سے متعلق کوئی بیان سامنے نہیں آیا ہے البتہ انڈین فوج نے اپنے ایک بیان میں کہا ہے کہ چین کے ساتھ ہونے والی جھڑپ میں بھارت کا کوئی فوجی لاپتا نہیں ہوا۔ سرحد پر موجود اہلکاروں کی تعداد پوری ہے۔

بیان میں مزید کہا گیا ہے کہ جھڑپ میں زخمی ہونے والے 18 فوجیوں کو طبی امداد دی جا رہی ہے جنہیں شدید چوٹیں آئی تھیں۔

 جمعرات کو ہلاک ہونے والے بھارتی فوجیوں کی آخری رسومات ادا کی گئیں جن میں ہزاروں افراد نے شرکت کی۔

امریکی نشریاتی ادارے وائس آف امریکا کے مطابق دونوں ممالک میں حالیہ کشیدگی کے بعد بھارت میں چین کی مصنوعات کے بائیکاٹ کے مطالبات میں شدت آتی جا رہی ہے۔ سوشل میڈیا پر ٹرینڈ چلائے جا رہے ہیں جن میں بھارتی شہریوں سے کہا جا رہا ہے کہ وہ چین کی مصنوعات استعمال نہ کریں۔

مزید :

بین الاقوامی -