’اگرایک بھی آدمی کو کوروناوائرس ہواتو مجھے پھانسی دے دینا‘مولانااشرف جلالی نے آل پاکستان سنی کانفرنس کروانے کااعلان کردیا

’اگرایک بھی آدمی کو کوروناوائرس ہواتو مجھے پھانسی دے دینا‘مولانااشرف ...
’اگرایک بھی آدمی کو کوروناوائرس ہواتو مجھے پھانسی دے دینا‘مولانااشرف جلالی نے آل پاکستان سنی کانفرنس کروانے کااعلان کردیا

  

لاہور(ڈیلی پاکستان آن لائن)تحریک لبیک یارسول اللہ ﷺکے چیئرمین محمد اشرف جلالی نے اعلان کیا ہے کہ ان کی پارٹی حکومت کی جانب سے اجتماعات پر پابندی کے باوجود21مارچ کوآل پاکستان سنی کانفرنس کا انعقاد یقینی بنائے گی۔

انہوں نے کہا کورونا کا رویا رونا ہے جس سے لوگوں کو شکوک و شبہات پیدا ہورہے ہیں اور انہیں ٹیلی فون بھی آرہے ہیں، اس لئے میں لائیو یہ اعلان کررہا ہوں کہ انشااللہ اکیس مارچ کو لاہور داتا کے دیس میں صراط مستقیم یونیورسٹی گراونڈ میں نماز مغرب کے بعد آل پاکستان سنی کانفرنس ہوگی‘۔انہوں نے کہا’اس سلسلے میں اگر حکومت کا معاملہ گارنٹی کا ہے تو میں سب کی گارنٹی دوں گا، میں توحید پرست ہوں ، مجھے پتہ ہے کہ اللہ کے ازن کے بغیرکوئی پر نہیں مار سکتا بندہ کوئی کیسے مار سکتا ہے؟ میں گارنٹی لکھ کردوں گا کہ اگر اس اجتماع کی وجہ سے ایک شخص کو بھی کورونا لگ جائے تو مجھے پھانسی دے دی جائے‘۔

مولانا اشرف جلالی کا جلال سے بھرپور یہ خطاب سوشل میڈیا پر خوب وائرل ہورہا ہے۔

یاد رہے کہ حکومت نے ملک بھر میں ایمرجنسی نافذ کررکھی ہے، جس کے تحت سکولوں ، کالجوں اور یونیورسٹیوں میں چھٹیاں کر دی گئی ہیں، مدارس بھی بند کردیئے گئے ہیں۔شادی بیاہ اور دیگر تقریبات پر بھی پابندی عائد ہے۔

خیال رہے پاکستان میں بھی کورونا وائرس کے مریضوں کی تعداد میں مسلسل اضافہ ہونے لگا۔ایک ہی دن میں40کیسز سامنے آگئے۔ سندھ میں مزید3بلوچستان میں مزید 22 ، خیبرپختونخوا میں نئے 15کیسز رپورٹ ہوئے ہیں جس کے بعدمجموعی طورپرملک بھر میں کورونا وائرس کے مریضوں کی کل تعداد341 تک جاپہنچی ہے۔

مزید :

علاقائی -پنجاب -لاہور -