کراچی،خاتون سمیت دو افراد کا لرزہ خیز قتل، سنسنی خیز انکشافات
کراچی(کرائم رپورٹر)شہرقائد کے علاقے اورنگی ٹاؤن میں خاتون سمیت دو افراد کا قتل نیا رخ اختیار کرگیا ہے، قتل کیس میں سنسنی خیز انکشافات سامنے آئے ہیں۔پولیس ذرائع کے مطابق رات گئے اورنگی ٹاؤن کے علاقے خیرآباد میں گھر سے خاتون اور مرد کی لاشیں ملی تھیں، مقتولین کو تشدد کے بعد تیز دھار آلے سے قتل کیا گیا تھا۔واقعے کی اطلاع ملنے پر پولیس جائے وقوعہ پر پہنچی اور لاشوں کو ضابطے کی کارروائی کے لئے اسپتال منتقل کیا اور قتل کے محرکات جاننے کے لئے تفتیش کا آغاز کیا۔پولیس نے قتل کے محرکات جاننے کے لئے متاثرہ گھر کا باریک بینی سے جائزہ لیا اور مقیم افراد سے پوچھ گچھ کی تو سنسنی خیز انکشافات سامنے آگئے۔پولیس کے مطابق چار بھائیوں نے گھر کی خواتین کے ساتھ مل کر اپنی بہن سمیت دو افراد کو قتل کیا،خاتون کو بھائیوں اور بھابھیوں نے گھر میں قتل کیا جبکہ مرد کو مقتولہ کے بھائیوں نے اس کے گھر کے دروازے پر قتل کیا۔پولیس کے مطابق مقتولہ کی بھابھیوں نے ثبوت مٹانے کیلیے فرش دھو ڈالا، مقتول خاتون شادی شدہ ہیں، ان کا شوہر سعودی عرب میں مقیم ہے، قتل ہونے والے مرد اور خاتون آپس میں رشتے بھی تھے۔
